Баян-Өлгий аймгийн  Ногооннуур сумын тавдугаар багийн “Ямаат”гэх газарт тус сумын харьяат малчин Е нь аравдугаар сарын 02-ны өдрийн 09:00 цагийн орчимд “Ачит” нуурын орчим малаа хариулж яваад сураггүй болсон бөгөөд унаж явсан морь нь аравдугаар сарын 03-ны өдөр гэрийнхээ гадна гүйж ирсэн байна. Орон нутгаас эрэн хайх ажиллагааг зохион байгуулж байгаа боловч үр дүнд хүрээгүй, нуурын усанд осолдсон байж болзошгүй тул хүч нэмэгдүүлэн ажиллах тухай хүсэлтийг аравдугаар сарын 03-ны өдрийн 20:40 цагт хүлээн авчээ.

        Тус аймгийн Онцгой байдлын газрын Гал түймэр унтраах, аврах 31 дүгээр анги, Эрэн хайх, аврах бүлгийн алба хаагчид аравдугаар сарын 04-ний өдрийн 11:00 цагт ангиас гарч 130 км замыг туулан 18:25 цагт очиж, Ногооннуур сумын харьяат малчин 40 настай эрэгтэй Е-г эрэн хайх ажиллагааг зохион байгуулж, мөн өдрийн 18:45 цагт “Ачит” нуурын дөрвөн метрийн гүнээс цогцсыг нь олж, тус сум дахь Цагдаагийн тасагт шилжүүлэн өгчээ.