БНСУ-аас Дэү брэндийн 2023 оны шинэ загварын гэх эхний ээлжийн 100 автобус Монголд ирсэн. Гэвч тус автобус 1993 оны хуучин загвар гэх мэдээлэл гараад байгаа. Тус асуудалтай холбогдуулан “Zyle Daewoo” компанийн захирал БНСУ-аас ирж мэдээлэл өглөө.

Тэрбээр “Солонгос улсын Дэү корпорацаас Монгол Улсын засгийн газар, ард иргэдээс уучлалт гуйж байна. Ирэх замдаа би хуучин Дэү автобус явж байгааг өөрийн нүдээр харлаа. 2014 онд Монгол Улс 400 автобус авах гэрээнд би өөрөө гарын үсэг зурж байсан. Энэ автобус Монгол Улсын зам дээр явж байгааг хараад сэтгэл хөдөллөө бас гайхлаа. Цар тахлын үед автобус үйлдвэрлэл зогсолтод орсон. Цар тахлын дараа Катар, Саудын Араб, Монгол Улстай “BS-106” загварын автобус нийлүүлэх гэрээ байгуулсан. Сүүлд Канад Улс манай үйлдвэрээс автобус авч, дараа нь нэмж 100 автобус захиалсан. Мөн ОХУ-ын томоохон хотуудад манай 5000 автобус явж байгаа. Манай компани Монгол Улстай дотно харилцаатай учир тус автобусны 30 хувийн хөнгөлөлтэй оруулж ирж байгаа. Монголын захиалга давчуу байсан тул бид будагтай холбоотой жижиг сажиг алдаа гаргаснаа хүлээн зөвшөөрч байна. Гэхдээ энэ бол том алдаа биш шүү. Сүүлийн өдрүүдийн мэдээ дунд  Дэү компани дампуурсан гэх мэдээ байсан. Манай компани дампуураагүй, одоог хүртэл үйлдвэрлэлээ явуулж, автобусаа угсарсаар байна. Арлын дугаар нь 30 жилийн өмнөх дугаар гарч ирсэн гэдэг бас нэг худлаа мэдээлэл гарсан. Энэ бол алдаатай мэдээлэл юм.Хуучин автобус оруулж ирсэн гэх мэдээлэл уншаад би маш их гайхсан. Манай байгууллага 2012 онд гаргасан дөрвөлжин загвартай автобус илүү бат бөх учир одоог үйлдвэрлэсээр байгаа. Илүү классик загвартай автобус гэж үздэг.  Манай компани өнөөг хүртэл үйлдвэрлэлээ явуулсаар байгаагийн шалтгаан нь манайх чанараа барьдаг, үргэлж сайжруулсаар байдаг. Хэдийгээр хуучин мэт харагдах ч 4-5 жил явсны дараа чанарыг нь ойлгох байх аа.Орж ирсэн автобуснаас хар утаа ялгарсан гэдэг хуурамч мэдээлэл. Шинэ автобуснаас эхэндээ хар утаа гарч магадгүй. Энэ Монголын дизель түлшний чанартай холбоотой. Урт хугацаандаа хар утаа гарахаа болино гэдгийг баталгаатай хэлэх байна.  Монгол Улсын Засгийн газар болон А.Ганхуяг захирлын яаруулсан шахалтаас болж бид алдаа гаргасан. Одоо алдаатай автобусаа буцаан татаж, гаргасан алдаагаа засна. Манай үйлдвэрлэлийн талаар худал мэдээлэл гаргасан явдалд Элчин сайдын яамаараа дамжуулан шүүхэд хандах болно” гэв.