Ховд аймгийн Мянгад суманд 27 мм, Жаргалант суманд 15 мм, Ховд суманд 13 мм хэмжээтэй цас орж, цаг агаарын гамшигт үзэгдэл болсныг Цаг уур, орчны шинжилгээний газраас мэдээлжээ. Тодруулбал, цаг агаарын гамшигт үзэгдлийн жагсаалтыг Монгол улсын Засгийн газрын 2015 оны 286 дугаар тогтоолоор баталсан байдаг. Их цасны гамшигт үзэгдэл гэдэг нь 12 цаг түүнээс доош хугацаанд 10 мм болон түүнээс их хэмжээтэй цас орохыг хэлдэг аж. Түүнчлэн өнгөрсөн шөнө Баян-Өлгий аймгийн Алтай суманд -15 градус хүйтэн хоносон нь хамгийн хүйтэн нь байлаа.

     Энэ талаар Ховд аймгийн Онцгой байдлын газрын мэргэжилтнээс тодрууллаа. Тэрбээр “Өчигдөр өдрөөс хойш орсон цас саяхан намдлаа. Их хэмжээний цас орсны улмаас төөрсөн, сураггүй болсон дуудлага бүртгэгдээгүй” гэлээ.