Намрын улирлыг хурааж авсан ургацаараа хийсэн амтат чанамалгүй төсөөлөхийн аргагүй билээ. Тэгвэл гэр бүлийнхэнтэйгээ цагийг хөгжилтэй өнгөрүүлж байх үедээ хийж болох амтат чанамлын жорыг хуваалцаж байна.

Аньсны чанамал

        Аньсыг угааж цэвэрлэж бэлтгээд нэг литр усанд 2,3 кг элсэн чихэр уусгаж бэлтгэсэн чихрийн халуун шүүсийг 1,8 кг аньстай саванд хийж хоёр  удаа чанана. Эхний удаа 20 минут зөөлөн буцалгаж хөр­гөөд 10 цаг байлгана. Хоёр дахь чаналтаар гүйцэд бол­гоно. Ариутгаж хатаасан ши­лэн савыг халаагаад чанамлыг шууд савлаж битүү таг­лана. Тасалгааны темпера­турт савны тагийг доош харуулан тавьж хөргөнө.

Үхрийн нүдний чанамал

      Цоморлогийн навч, шилбэ­нээс салгаж угаагаад 2-3 ми­нут буцалсан усанд дүрж усыг гоожуулна. Чанах саванд хийсэн нэг кг жимсэн дээр 325 мл усанд 1,2 кг элсэн чихэр уусгаж бэлтгэсэн чихрийн халуун шүүс нэмж 3-4 цаг байл­гасны дараа зөөлөн га­лаар бэлэн болтол чанана. Ха­луун чанамлыг халаасан, хуурай шилэн саванд хийж таглаад хөргөнө.

Чацарганын чанамал

        Чацарганаар чанамал хийхдээ бусад жимсний адил хийх боловч хүчиллэгийг нь саармагжуулахын тулд нэг кг нухаш тутамд 10-17 гр бикар­бонат натри хольж өгдөг.

Нэрсний чанамал

         Хагараагүй жимсийг буцалсан хүйтэн усаар зайлж цэвэрлэсний дараа чанах саванд хийсэн нэг кг жимсэн дээрээ 200 мл усанд 1,5 кг элсэн чихэр уусгаж бэлтгэсэн чихрийн халуун шүүс нэмж 2-3 цаг байлгасны дараа зөөлөн гал дээр чанаж бэлэн болгоод бусад чанамлын нэгэн адил аргаар савлаж хадгална. Нэрс их хэмжээтэй ургадаг газарт нэрсний чанамлыг сэрүүн байранд паалантай том саванд хийж тагийг нь сайтар таглан хадгалж болно.

Алимын чанамал

         Хальс, үрээс нь цэвэрлэ­сэн алимыг 15-20 мм зузаан­тай хэсэг болгон хэрчээд буцалмал усанд 3-5 минут угааж цэвэрлээд дараа нь хүйтэн ус хийж хөргөнө. Хөрсний дараа уснаас гарган тавьж дээр нь элсэн чихрийн халуун шүүс нэмж 2-3 цаг байлгана. Ингэж байлгахад элсэн чихэр алимд шин­гэнэ. Дараа нь зөөлөн гал дээр бэлэн болтол нь чанана. Чанах явцад чанамлын дээд хэсэгт алимны өнгөтэй тунга­лаг хөөсөн бөмбөлгүүд үүсэж эхлэнгүүт чаналтыг зогсоож хадгалах савуудад савлан хөргөж хадгална. Алимын төрөл, сортоос хамаарч чана­малд орох элсэн чихрийн хэмжээ өөрчлөгдөх боловч ерөнхийдөө нэг кг жимс, нэг кг элсэн чихэр, 100 мл ус орно.

Шар луувангийн чанамал

         Шинэхэн хураасан шар луувангаа угааж цэвэрлээд, хэсэгчлэн хэрчиж халуун усанд хийж 5-8 минут чанана. Усыг гоожуулсны дараа элсэн чихрийн халуун шүүс нэмж 4-5 цаг байлгаад зөөлөн гал дээр тавьж болтол нь буцалгаад амт оруулах зорилгоор ванилин эсвэл нимбэгийн хүчил нэмж сайтар хутгаад савлаж хөргөнө. Энэхүү чанамлыг хаврын цагт чацарганын шүүстэй хутгаж хүүхэд, эхчүүд, өндөр настанд өгөхөд витамины дутагдлыг хялбархан нөхөж чадна. Шар луувангийн чанамал хийхэд нэг  кг шар лууван, 1,5 кг элсэн чихэр, нэг литр  ус орно.

Тарвасны чанамал

         Шинэхэн хураасан дутуу болсон тарвасын гадна талын хатуу хальсыг хутгаар огтлон хуулж цэвэрлэсний дараа жижиглэн хэрчинэ. Гал дээр зөө­лөн болтол нь чанаж дээр нь элсэн чихрийн шүүс нэмж хий­гээд хутгана. Хутгах явц­даа гал дээр байлган бага зэрэг буцалгаад бэлэн болсны да­раа нимбэгийн хүчил юм уу ванилин нэмж савлан хөргөнө. Тарвасны чанамал хий­хэд нэг кг цэвэрлэсэн тарвас, 1,5 кг элсэн чихэр, 400 мл ус орно.