Монголын багш нарын үйлдвэрчний эвлэлийн холбооноос багшийн цалинг нэмэх шаардлагын хүрээнд ажил хаялт зохион байгуулах талаар мэдээлэл өглөө. Энэ үер тус холбооны дарга Д.Мөнхбаатар үг хэллээ.

Тэрбээр “Багшийн цалинг 1000 ам.долларт хүргэх саналыг бид тооцоолол судалгаатайгаар, эдийн засагчидтай зөвлөж байж гаргасан. Бид 2023 оны есдүгээр сарын 11-нд БШУ-ы сайд Л.Энх-Амгаланд салбарын хэлэлцээрийг эхлүүлэх тухай мэдэгдэл хүргүүлсэн. Мэдэгдлийн хугацаа Хөдөлмөрийн хуулийн дагуу аравдугаар сарын 03-нд дуусна.  Хэрэв энэ хугацаанд хэлэлцээр эхлүүлэхгүй бол Монголын багш нар аравдугаар сарын 05-нд буюу "Дэлхийн багш нарын эрхийг хамгаалах өдөр"-өөр улсын хэмжээнд ажил хаяхаар төлөвлөж байгаа.  Ажил хаялтад одоогоор холбооны гишүүн 150 гаруй сургууль нэгдэхээ илэрхийлсэн.  Хэлэлцээрийн гол нь багийн цалинг ойрын гурван жилийн дотор 1000 ам.долорт хүргэ гэж байгаа юм. Сүүлийн 30 гаруй жилд багшийн цалинг ам.доллартой харьцуулбал өсөөгүй. Ер нь 300 ам.долларт эргэлдэж ирсэн. БШУ-ы сайдын хэлээд байгаа 2.5 сая төгрөгийн цалинг олон жил ажилласан, нэмэгдлүүдээ тултал авч байгаа цөөн багш нар л авч байна.  Харин дөнгөж ажилд орж байгаа залуу багш нар 1.2 сая төгрөг авч байна.  Ийм цалингаар багшийн ажлыг хийнэ гэдэг боломжгүй. Монголоос ядуу эдийн засагтай улсуудад багшийн цалин 800 доллар хүрчихсэн байна. Монгол шиг байгалийн баялагтай улсад багшийн цалинг нэн даруй 1000 ам.доллар хүргэх бүрэн боломжтой. Эхний жил буюу 2024 оны есдүгээр сарын 1-нээс багшийн цалинг 60 хувиар нэмэх санал тавьж байна. Ингэж чадвал цалин хоёр сая төгрөгийн босго давна. Дараа жилээс 50 хувиар нэмж  1000 ам.долларт хүрэх боломжтой гэж харж байна. Мөн Монголын багш нарын үйлдвэрчний эвлэлийн холбооноос боловсролын салбарын үйлчилгээний ажилчдын цалинг анхаарахыг шаардаж байна. Үйлчилгээний ажилчдын цалин 750 мянган төгрөг байгаа. Өнөөдөр 750 мянган төгрөгөөр хүн шиг амьдрах боломж алга. Боловсролын салбарын ажилчдын 90 гаруй хувь нь зээлтэй, өрнөөс өрний хооронд амьдарч байна. Одоо ажилд авъя гэхээр багш байтугай сургуулийн жижүүр, харуул олдохоо больсон. Боловсролын салбар эзэнгүй болох дөхөж байна. Улс төрчид элдэв хурал зөвлөгөөн хийж, одон медаль тараалгүй, зөвхөн боловсролын салбарын ажилчдын нийгмийн асуудалд анхаараад өгөөч гэж уриалга хүргэж байна. Мөн ерөнхий боловсролын сургуулийн багш нар анги удирдсаны нэмэгдэл гэж 10 хувь авдаг.  Анги удирдсан багш маш ачаалалтай ажилладаг. Хүүхдийн тоотой уялдуулж хүүхэд тутамд нэг хувийн нэмэгдэл олгохыг хүсэж байна. Цэцэрлэгт бүлэг удирдсаны багшийн нэмэгдэл байдаггүй” гэв.