12-13 насны хоёр сурагч сургуулийнхаа ойролцоох явган хүний гарцан дээр машинд дайруулсан хэрэг өчигдөр гарсан. Тодруулбал, “Приус-30” загварын автомашинтай 27 настай жолооч 122 дугаар сургуулийн сурагчдыг дайрч, нэг нь газар дээрээ нас барсан бол нөгөөгийнх нь биеийн байдал хүнд ГССҮТ-д хүргэгдээд байгаа юм.

   Урьдчилсан байдлаар осол гаргасан жолооч хурд хэтрүүлсэн, осол гаргах үедээ архи согтууруулах ундааны зүйл хэрэглээгүй байсан гэх. Хамгийн ноцтой нь, охид гарцаар гарч яваад дайруулж, нэг нь амиа алдсан юм. Эмнэлэгт хүргэгдсэн охины шагайны яс хугарч, эмчилгээ хийлгэж байна. Одоогийн байдлаар осол гаргасан жолоочийн цуснаас шинжилгээ авч, хэргийг цагдаагийн байгууллагаас шалгаж байгаа аж.

   Бид осол гаргасан “Приус-30” загварын автомашины жолоочийн эхнэртэй нь холбогдож, тухайн үед юу болсон талаар тодрууллаа. Тэрбээр “Маш харамсалтай осол болсонд бид харамсаж байна. Охидын гарсан зам хэсэгт гэрлэн дохио байгаагүй юм билээ. Талийгаач охины ар гэрийнхэнтэй хэрхэн, яаж уулзахаа мэдэхгүй байна. Осол гарсны дараа охины ар гэрийнхнийг холоос хараад очиж чадаагүй. Бид маш их харамсаж байна. Нөхөр минь сэтгэл санааны гүн хямралд орсон байдалтай байна. Тэр өчигдөр барилгын материалын дэлгүүр орчихоод гэр рүү яарч явах үедээ осол гаргасан. Хурд хэтрүүлсэн нь үнэн. Харин архи, согтууруулах ундааны зүйл хэрэглээгүй” гэлээ.

Иймд эцэг, эх, асран хамгаалагчид хүүхдэдээ тавих хараа хяналтаа сайжруулж, сонор сэрэмжтэй байхыг анхааруулж байна.