Завхан аймагт Тарваган тахлын сэжигтэй тохиолдол илэрч түргэвчилсэн шинжилгээгээр батлагдсан тул Улиастай сумаас гарах хөдөлгөөнийг, Яруу сумаас орох, гарах хөдөлгөөнийг зургаан хоногийн хугацаатай хязгаарлахаар шийдвэрлэсэн байна. Энэ талаар Завхан аймгийн Онцгой байдлын газрын дарга, хурандаа Ө.Болд мэдээлэл өглөө.

    Тэрбээр “Яруу сумын харьяат иргэн нохой зууж ирсэн тарвага өвчиж, гэр бүлийнхэнтэйгээ чанаж идсэн урьдчилсан нөхцөл байдал тогтоогдсон. Туханй иргэн одоогийн байдлаар халуурч, булчирхай нь цочсон нөхцөл байдалтай байгаа. Мөн шинжилгээний хариугаар тарваган тахал байх нөхцөл байдал их байна гэж үзсэн. Тиймээс аймгийн Онцгой комисс шуурхай хуралдаж, Аймгийн Засаг даргын захирамжаар Яруу, Улиастай сумын орох, гарах хөдөлгөөнийг зургаа хоног хязгаарласан. Мөн тухайн иргэний нэгдүгээр хавьтлыг тогтоох, явсан маршутын дагуу шалгах ажил үргэлжилж байгаа. Тухайн иргэн олон хүнтэй уулзсан байх магадлалтай” гэв.