Архангай аймгийн Хангай суманд дөнгөж шинээр барьж, бэхжээгүй зам дээр автомашин явж, эвдсэн талаар цахим сүлжээнд зураг нь нийтлэгдсэн.

Энэ талаар Хангай сумын Засаг дарга Д.Өрнөхбаяртай холбогдож тодрууллаа. Тэрбээр “Сумын төвөөс гүүр хүртэл 2.4 километр автозам тавьж байгаа юм. Хатаж амжаагүй байсан зам дээр өчигдөр шөнө автомашин явсан байсан. Нийт 20 гаруй метр хатаагүй замаар явсан байна  лээ. Цагдаагийн байгууллагаас шалгалт хийж байна. Зам дээгүүр явсан машиныг хараахан олоогүй байгаа. Тиймээс одоогийн байдлаар хохирлын хэмжээ болон хэрхэн хохирлоо барагдуулах талаар шийдвэрт хүрээгүй байна” гэв.

Эх сурвалжийн мэдээлж байгаагаар тус хэсэгт замын тэмдэг, тэмдэглэгээ болон хаалтыг хийгээгүй байсан гэв.