НҮБ-ын Ерөнхий Ассамблейн 78 дугаар чуулганы Ерөнхий санал шүүмжлэлийн үеэр зохион байгуулах Тогтвортой хөгжлийн асуудлаарх дээд түвшний уулзалтыг угтсан “Тогтвортой хөгжлийн зорилгын төлөөх үйл ажиллагаа” өдөрлөг 2023 оны есдүгээр сарын 16-17-ны өдрүүдэд Нью-Йорк хотноо болов.

      Монгол Улс энэхүү өдөрлөгт оролцож, Ботсвана Улс болон НҮБ-ын Нэн буурай хөгжилтэй, далайд гарцгүй хөгжиж буй болон арлын жижиг орнуудын асуудал эрхэлсэн дээд төлөөлөгчийн газар, Олон улсын худалдааны төв зэрэг байгууллагатай хамтран “Далайд гарцгүй хөгжиж буй орнууд (ДГХБО)-ын алдагдсан боломжийг эргэн сэргээх нь: Худалдаа ба цахимжуулалтын үүрэг” сэдэвт тусгай арга хэмжээ, НҮБ-ын Ази, Номхон далайн эдийн засаг, нийгмийн комисстой хамтран “Жендэрт тулгуурласан санхүүжилтийг нэмэгдүүлэх нь: Тогтвортой хөгжлийн зорилгыг урагшлуулах арга хэрэгсэл“ сэдэвт тусгай арга хэмжээг зохион байгууллаа.

       Эдгээр арга хэмжээний үеэр Монгол Улсаас НҮБ-ын дэргэд суугаа Байнгын төлөөлөгч В.Энхболд тогтвортой хөгжлийн зорилгыг үндэсний хэрэгжилт, түүний дотор цахим эдийн засгийг хөгжүүлэх, жендэрийн тэгш байдлыг хангах хүрээнд Засгийн газраас авч хэрэгжүүлж буй бодлого, үйл ажиллагааны талаар танилцуулж, бичил болон жижиг, дунд үйлдвэрлэгчдэд тулгамдаж буй нийтлэг сорилт бэрхшээлийг даван туулж буй болон бизнес эрхлэгч эмэгтэйчүүдийг дэмжин ажиллаж байгаа талаарх туршлагаасаа хуваалцав.