"Эрдэнэт үйлдвэр" ТӨҮГ-ын алба хаагчид өнөөдөр 7:00 цагаас ажил хаялт зарлаж буйгаа албан ёсоор мэдэгдлээ. Тодруулбал, тус үйлдвэрийн алба хаагчид цалингаа нэг дор 50 хувь нэмэгдүүлэх шаардлага тавьж, зөвшилцөх ажлын хэсэг байгуулсан ч уг саналыг "Эрдэнэт" үйлдвэрээс хүлээж авах боломжгүй гэдгээ илэрхийлсэн байна.

Үйлдвэрчний эвлэлээс удирдлагуудад тус шаардлагыг тавьж ажил хаялт зарлаж байгаа аж.

•  Үйлдвэрчний эвлэлээс цалингийн хэмжээг 50 хувиар өсгөх
•  Эрдэнэт үйлдвэрийн ажилтнууд тэтгэвэрт гарахдаа хүүхдээ үйлдвэрт ажилд оруулдаг байдлыг тус үйлдвэрийн Г.Ёндон цуцалж, бүх ажилтныг сонгон шалгаруулж ажилд авахаар болсон юм. Тэгвэл ажил хаяж буй ажилтнууд энэ шийдвэрийг эсэргүүцэн ажилчдын хүүхдийг шууд ажилд авахыг шаардаж байгаа юм.

      Ажил хаялт зарласны улмаас үйлдвэрийн үйл ажиллагаа бүрэн зогсоод байна. Үүссэн нөхцөл байдалтай холбогдуулан Эрдэнэт үйлдвэр ТӨҮГ-ын Ерөнхий захирал Г.Ёндон "Ажил хаялтад оролцсон ажилчдын хувьд хууль бус гэдэг нь шүүхээр тогтоогдвол хүндрэлтэй нөхцөл байдал үүснэ гэдгийг анхааруулж хэлэх үүднээс уриалга гаргасан. Үндсэн цалинг 50 хувиар нэмэх, үйлдвэрийн зүгээс тавьсан шаардлагыг хүлээж авахгүйгээр зөвхөн өмнөх жишгээр ажиллана хэмээхээс гадна үйлдвэрийн үндсэн дэгээ зөрчсөн үйлдлүүдийг цохон тэмдэглэж шүүхэд хандсан байгаа. 2023 онд Мөнгөншагай нь ҮЭХ-ны сонгуульд өрсөлдөх үедээ ажилчдын үндсэн цалинг 50 хувь нэмэгдүүлнэ гэсэн санал оруулж байсан. Тухайн үед сонгуульд өрсөлдөж байсан хүмүүсийн мөрийн хөтөлбөртэй үйлдвэрийн удирдлага танилцаж, зарим зүйлийг хэрэгжүүлэх боломжгүйг анхааруулж, мэдэгдэл гаргаж байв. Хамтын гэрээнд уг асуудлыг оруулъя гэх үед нь боломжгүйг тайлбарлаж, хэлж байсан. 2024 оноос "Эрдэнэт үйлдвэр" ТӨҮГ-ын ажилтнуудын цалинг 15 хувиар нэмэх саналыг "Эрдэнэс Монгол" компанийн тайлангийн хурлын үеэр танилцуулж, зөвшилцөлд хүрсэн байсан. Энэ дагуу бизнес төлөвлөгөөгөө боловсруулж байсан. Энэ нөхцөл байдалд ҮЭ-ээс ажилчдын цалинг нэмэх санал тавьсан бөгөөд бидний зүгээс 2024-2026 онд 15 хувь буюу гурван жилийн хугацаанд 56 хувиар цалин нэмэх тооцоог гаргаж танилцуулсан. Гэвч үйлдвэрчний эвлэл хүлээж аваагүй. Бидний тавьсан санал хэвээрээ байгаа" хэмээн мэдэгдлээ.

           Харин "Эрдэнэт үйлдвэр" ТӨҮГ-ын үйлдвэрчний холбоо мэдээлэл хийх үеэрээ "Ковидын хүндрэлтэй цаг үед "Эрдэнэт үйлдвэр" ТӨҮГ-ын ажилтнууд айл өрх, аж ахуйн нэгж байгууллагуудын цахилгаан, ус дулаан, хогны мөнгийг нэг жил зургаан сар төлсөн. Үүний тулд 7000 гаруй уурхайчин зогсох, өвдөх эрхгүй тасралтгүйгээр хөдөлмөрлөсөөр ирсэн. Одоо ч хангалттай сайн ажиллаж байна. Ажилчдын нийгэм, эдийн засгийн хамтын гэрээний хэд хэдэн заалтад саналын зөрүүтэй байдал үүссэнийг үйлдвэрийн захиргаа хүлээж авахгүй байна. 2023 оны нэгдүгээр сараас захиргаанд таван удаа албан бичиг хүргүүлсэн. Ажил олгогч хайхрамжгүй, үл хүндэтгэлгүй хандаж байна" гэсэн юм.