НҮБ-ын Хүнс хөдөө аж ахуйн байгууллагын “Бичил биетний тэсвэржилттэй холбоотой кодексын стандартын хэрэгжилтийг дэмжих арга хэмжээ” төсөл, “Нэг эрүүл мэнд” төсөлтэй хамтран 21 аймаг, нийслэлийн Мал эмнэлгийн лабораторид малын эмийн үлдэц, бичил биетний тэсвэржилтийг тодорхойлох шинжилгээний арга зүйг эзэмшүүлэх сургалтыг дөрвөн бүс болгон анх удаа мал эмнэлгийн салбарт зохион байгууллаа.
 
      Энэхүү сургалт зохион байгуулагдсанаар аймаг, нийслэлийн Мал эмнэлгийн лабораториуд Европын холбооны журмын шаардлагыг хангасан аргаар малын мах, сүүнд антибиотикийн үлдэгдлийг тодорхойлох чадавх, бичил биетний тэсвэржилтийг тодорхойлох антибиотикийн мэдрэг чанарын шинжилгээний чадавх тус тус бүрдэж нийтийн эрүүл мэндийг хамгаалах, хүнсний аюулгүй байдлыг хангахад чухал ач холбогдолтой юм.
 
       Сургалтыг эхний ээлжинд төвийн бүс Өвөрхангай аймагт есдүгээр сарын 11-13-ны өдрүүдэд зохион байгууллаа. Сургалтад Төв, Дундговь, Архангай, Өвөрхангай, Баянхонгор, Завхан аймгийн Мал эмнэлгийн лабораторийн Ариун цэвэр, магадлан шинжилгээний эмч, Нян судлалын шинжээч эмч гээд нийт 12 албан хаагч хамрагдсан байна.