Засгийн газрын хуралдаанаас гаргасан шийдвэрийг танилцуулаа.

          Энэ үеэр Хүнс хөдөө аж ахуй, хөнгөн үйлдвэрийн сайд Х.Болорчулуун “Энэ жил Хүнсний аюулгүй байдлын 37 дугаар тогтоолын үр дүнд Засгийн газрын бодлого хэрэгжилт, тариачдын хөдөлмөрийн үр дүнд ургацын баланс эерэг, өөдрөг гарч байгаа. Тухайлбал, хагас сая 510 мянган тонн үр тариа хураах тоо гарсан. Үүнээс улаан буудай 480 мянган тонн хураах урьдчилсан тооцоо гарсан. Сүүлийн 10 жилд ийм ургац явагдаагүй. Тэгэхээр бид цаг хугацаандаа тариалаад явахад гаднаас гурилын будаа авахгүйгээр дотооддоо 100 хувь хангах боломжтой байна. Төмсөө 100 хувь хангана, хүнсний ногоо 14 мянган га тариад 165 мянган тонн хурааж авах урьдчилсан баланс гарсан. Ирэх жилээс манай улс хүнсний ногоогоо 90-100 хувь хангах боломж бүрдэж байна. 65 мянган тонн тосны ургамал хураана. Харин энэ жил ургац хураалтад 10 гаруй мянган оюутан, сурагчид ажиллах төлөвлөгөөтэй байна. Засгийн газраас стратегийн хүнсний нөөц бүрдүүлэх  тогтоол гарлаа” гэв.   

       Үргэлжлүүлэн сэтгүүлчдийн асуултад “Борлуулалт дуусаагүй байхад гаднаас улаан буудай оруулахыг хориглосон. Энэ жил ургац арвин байгаа учир үнэ хэтэрхий өсөх хандлага гарахгүй болов уу гэж үзэж байна. Засгийн газраас борлуулах тал дээр гадны ногооноос хамгаалах бодлогыг УИХ-аар оруулна. Хүнсний аюулгүй байдлын 37 дугаар тогтоолын дагуу зургаан хувийн хүүтэй зээл авч зоорь барих ажлыг аймаг бүрд хэрэгжүүлж байгаа. Харин үхэр ээрмэгжүүлэх буюу паспорттой болгох, бүртгэлжүүлэх ажлыг баттай хийж байж үхрийн мах гадагш экспортод гарах шаардлага хангадаг. Энэ жил үхэр ээрмэгжүүлэх төсөв байхгүй байсан. Ирэх жил дөрвөн тэрбум орчмын төсөв тавьж байгаа учир ирэх хавраас шүлхийн вакцинтай цуг бүртгэлийн ажлыг хийнэ. Гэхдээ тав, зургаан аймагт мал эмнэлгийн эрүүл бүс байгуулах Засгийн газрын тогтоол гарсан. Энэ дагуу эрүүл бүс бүхий аймгаа эхний ээлжид бүртгэлд оруулж, улмаар мал махаа үнэтэй гаргах боломж бүрдүүлэхээр ажиллаж байна” гэлээ.