Зам тээврийн ослын улмаас өнгөрсөн сард амиа алдсан эмэгтэйн элэг, бөөрийг донор болгох хүсэлтийг холбогдох албаныхнаас ар гэрийнхэнд нь тавьж, зөвшөөрснөөр донор болгосон байдаг.  Гэвч ар гэрийнхэн нь "Гэрээнд тусгаснаас өөр эрхтнүүдийг нь донор болгосон буюу талийгаачийн өвдөг, шагайг зүсэж, шөрмөсийг нь авсан байж болзошгүй байгаа. Учир нь, өвдөг, шагайг нь тэр чигт нь зүсээд төмөр утсаар оёсон байна лээ. Бид маш их гомдолтой байгаа. Элэг, бөөрийг нь бусдад тус болог, амьдрал бэлэглэг гээд донор болгохыг зөвшөөрснөөс өөр эд, эрхтнийг нь авахыг зөвшөөрөөгүй. Мөн бидэнд донор болсны 3.5 сая төгрөг өгнө гэсэн боловч өгөөгүй. ЭМЯ-ны нэг мэргэжилтэн "Чинбүрэн эмч бид нар тэр мөнгийг олгох асуудлыг ярилцаж байна. Болохгүй бол хувиасаа өгөөд дараа нь бид нөхөөд авах талаар хөөцөлдөж байна" гэсэн хэмээн хэвлэлд мэдээлээд буй. Үүнтэй холбоотойгоор бид "Ар гэрийнхнийх нь зөвшөөрөлгүй эд, эрхтнийг нь донор болгох боломжтой юу. Ийм тохиолдол өмнө нь гарч байсан уу. Талийгаачийн биеийг ямар учраас төмөр утсаар бөхөлсөн байсан бэ. Мөн донор болсон мөнгөн тэтгэмжийг нь ямар учраас ар гэрийнхэнд нь олгохгүй байгаа вэ" гэдгийг холбогдох байгууллагын мэргэжилтнүүдээс тодрууллаа.

                 Энэ талаар Эрүүл мэндийн яамны мэргэжилтэн Б “Донор болгоход гурван талт гэрээ байгуулдаг. Үнэндээ Донорын төвөөс талийгаачийн ар гэртэй ярилцаж, элэг, бөөр, шөрмөсийг нь донор болгож авах гэрээ хийсэн юм билээ. Өөрөөр хэлбэл, талийгаачийн шөрмөсийг ч донор болгон авах гэрээ байгаа гэсэн үг. Талийгаачийн өвдөг, шагай орчмыг төмөр утсаар оёсон байсан талаар ар гэрийнхэн нь мэдээлсэн байна лээ. Өвдөг, шагайг нь оёсон утас төмөр утас бус, олон улсад ашигладаг зориулалтын утас. Донорын тухай хуульд тархины үхжилттэй хүнийг донор болгосон тохиолдолд Нийгмийн даатгалаас олгодог сая төгрөгийг 3.5 дахин үржүүлж олгох заалт тусгасан байдаг. Гэтэл донорын хагалгааны дараа талийгаач нийгмийн даатгал төлдөггүй байсныг холбогдох байгууллага шалгаж, тогтоосон. Оршуулгын зардал болгож өгдөг сая төгрөгийг нийгмийн даатгал төлдөггүй талийгаачийн ар гэрт олгодоггүй. Ийм учраас нөхөн төлбөр гэх мөнгийг олгоогүй байгаа юм билээ. Тиймээс манай байгууллагаас хуулийн заалтад донор болсон иргэн бүрд 3.5 сая төгрөг олгоно гэсэн заалт тусгаж, оруулахаар ярилцаж байна. Гэхдээ талийгаач А-гийн гэр бүлд дээрх мөнгийг нөхөж олгохоор холбогдох албаныхан ажиллаж байгаа. Талийгаачийн ар гэртэй бид байнга холбоотой байгаа” гэв.

            Шүүх шинжилгээний үндэсний төвийн ажилтан А тус хэргийн талаар “Манайх энэ асуудалд мэдээлэл өгөх боломжгүй. Цагдаагийн байгууллагаас цогцос шалгуулах хүсэлт өгсөн тохиолдолд дахин шинжилгээ хийх боломжтой” гэв.