Ипотекийн зээлийн талаар өмгөөлөгч нар мэдээлэл өглөө.  Энэ үеэр өмгөөлөгч О.Батхүү “Монгол Улсад ипотектийн зээлтэй 115 мянган иргэн бий. Тус зээлийг олгоход банкууд өөрсдийнхөө давуу талыг ашиглаж хууль зөрчиж, нэг хувийн шимтгэлийг хууль бусаар авсан байна гэдгийг Захиргааны хэргийн давж заалдах шатны шүүхээс тогтоосон. Нэр бүхий есөн банк дээрх шийдвэрийг үгүйсгэж Улсын дээд шүүхэд гомдол гаргасан боловч Улсын дээд шүүх хүлээж авахаас татгалзлаа. Энэ нь банкууд хууль зөрчсөн нь эцсийн байдлаар тогтоогдож байна гэсэн үг. Банкууд нэг хувийн шимтгэлийг иргэдийн данс руу шилжүүлэхгүй бол бид шүүхийн шийдвэр гүйцэтгэлийн журмаар албадан гүйцэтгүүлнэ. ШӨХТГ-ын шалгалт 2021 оны долдугаар сарын 1-нээс хойш зээл авсан иргэд хүлээх ёстой. 2013 оноос орон сууцны хөтөлбөрийг хэрэгжүүлсэн. Орон сууцны хөтөлбөрийн санхүүжилтийн тодорхой хувийг татвар төлөгчдийн мөнгөөс олгосон байдаг. Тэгэхээр тус хугацаанд төлсөн иргэд шимтгэлээ буцааж авах ёстой” гэлээ.