Эргэлт.мн мэдээллийн сайтын гурван жилийн ой өнгөрсөн бямба гарагт болж, Нэвтрүүлэг, тоймчдын албаны сэтгүүлч А.Азсайхан, Нийгэм, соёл урлагийн албаны сэтгүүлч Д.Бямбасүрэн, Х.Доржпалам нарыг МСНЭ-ийн "Ган үзэг" шагналаар шагнасан билээ.

    Нэвтрүүлэг, тоймчдын албаны сэтгүүлч А.Азсайхан нь Эргэлт.мн мэдээллийн сайтын гадаад мэдээ, "Ховор яриа", "Тэд бидний тухай", "Дэлхий дахинд", "Ажлын ширээ" зэрэг буланг хариуцаж ажилладаг. Тэрбээр утга зохиол яруу найргийн төрлөөр 2018 онд Дорноговь аймгийн зохиолчдын "Мянган толгодын орон" /хамтын/ , Төрийн шагналт яруу найрагч Р.Чойномын нэрэмжит "Залуу нас" дугуйлангийн "Дөт" /хамтын/, бие даан "16 дугаар гудамж" шүлгийн түүвэр хэвлүүлжээ. Мөн 2022 онд "Эргэлтийн номын сан" шилдэг бүтээлийн цувралд сэтгүүл зүйн орчуулгын төрлөөр "Хязгааргүй" ховор ярилцлага, захидлын ном хэвлүүлсэн. Мөн Нийгэм, соёл урлагийн албаны сэтгүүлч Д.Бямбасүрэн нь Эргэлт.мн мэдээллийн сайтын 2022 оны шилдэг бүтээлийн эзнээр шалгарч байлаа. Тэрбээр хөрөг нийтлэл, ярилцлагын буланг хариуцаж ажилладаг шилдэг сэтгүүлчдийн нэг юм. Түүнчлэн "Эргэлтийн номын сан" цувралд багтсан "Сул өвс ганхсан намар" тэмдэглэл, ярилцлагын номтой.

  Мөн Эргэлт.мн мэдээллийн сайтын Нийгэм, соёл урлагийн албаны сэтгүүлч Х.Доржпалам 2022 онд Эргэлт.мн мэдээллийн сайтын шилдэг залуу сэтгүүлчээр шалгарч байсан. Тэрбээр 2018 онд "Хөхөлбөр туяат хавар" яруу найргийн ном, 2019 онд "Хар шоо" хамтын ном, Р.Чойномын нэрэмжит "Залуу нас" дугуйлангийн "Дөт" хамтын ном, 2021 онд Өвөрхангай аймгийн ЗНЭ-ээс хамтран гаргасан "Алтан бярга" яруу найргийн ном тус хэвлүүлсэн. Мөн тэд "Дөрвөн өөр намар" яруу найргийн түүвэр хэвлүүлсэн билээ.