Боловсролын ерөнхий газрын дарга Т.Ням-Очир цаг үеийн асуудлаар мэдээлэл өгч байна.

         Тэрбээр “2023-2024 оны хичээлийн жилд Засгийн газраас Ерөнхий Боловсролын Сургуулиудыг гурван ээлжээр хичээллүүлэхгүй байх тал дээр цогц арга хэмжээ авах тогтоол гаргасан. Үүнтэй холбоотойгоор 6-8 сард ажлын хэсэг ажилласан. Эхний ээлжид бид богино хугацааны гурван шийдлийг хийхээр төлөвлөсөн. Нэгдүгээрт шаардлагатай хөрөнгө оруулалтын ажлыг эрчимжүүлье. Өөрөөр хэлбэл он дамнаж төсөл тавигдсан, 2023 онд багтаж дуусах болохгүй арга хэмжээг гүйцэтгэгч компанийн оролцоотойгоор онд багтааж дуусгая. Үүнтэй холбоотойгоор хөрөнгө оруулалтыг эрчимжүүлнэ. Бид 21 барилга байгууламжийг энэ онд багтааж, хэсэгчилсэн болон ямар нэг  байдлаар  ашиглалтад хүлээж авна. Хоёрдугаарт газар байхгүй, хөрөнгө оруулалт төлөвлөгдөөгүй сургуулиуд дээр  сургалтын байруудыг түрээсийн байдлаар ашиглаж зохион байгуулна.  Гуравдугаарт сургуулиудын дотоод нөөц бололцоог ашиглах, анги танхимыг хооронд нэгтгэж арга хэмжээг авсан.

                Өнөөдрийн  байдлаар 27 сургууль 28 түрээсийн байрыг сургалтын байдлаар ашиглаж болно гэх тооцоо гараад байгаа. Үүнд түрээслэгч иргэн, аж ахуй нэгжээр засвар тохижуулалтыг нь хийлгээд, хичээллүүлэх тал дээр ажиллаж байна.  Ажлын хэсэг гурван сарын хугацаанд ажилласан ч арав гаруй сургуулийн байрыг шийдэж чадсан” гэлээ.