БОАЖЯ-наас Богдхан дархан цаазат газарт ашиглалтын бус газар олголтыг цуцалсан тухай, ан агнуурын хуваарилалт, хэрэгжилт болон үерийн дараах хяналт, шалгалтын дүгнэлтийн талаар мэдээлэл өгч байна. Энэ үеэр Байгаль орчны салбарт улсын хэмжээнд хэрэгжиж байгаа хяналт, шалгалтын ажлын талаар мэдээлэл өглөө.

    Тэрбээр “Наймдугаар сард  салбарын хүрээнд 160 өргөдөл гомдлыг хүлээж авсан байна. Үүнээс 126 өргөдөл гомдлыг шийдвэрлэсэн. 23 өргөдөл шийдвэрлэлтийн шатанд явж байна. Үүнээс 80 өргөдөл, гомдлыг хялбаршуулсан журмаар шийдэж, 23 гомдолд зөрчлийн хэрэг нээсэн. Зөрчил шалган шийдвэрлэх ажиллагааны үеэр 89 иргэн, ААН-д 118 сая төгрөгийн торгууль ноогдуулсан. Мөн 61 иргэн, ААН-д 799832000 төгрөгийн нөхөн төлбөр оногдуулсан. Хууль бусаар амьтан агнасан, усны нөхөн төлбөр тооцуулах, зөвшөөрөлгүй гүний худаг гаргасан, усан сан бүхий газар элс хайрга олборлосон, тарвага ангасан, хууль бусаар ашигт малтмал эрч хайсан зөрчлүүдэд гомдол ирсэн. Мөн Архангай аймгийн Цэнхэр суманд амралт,аялал жуулчлалын чиглэлээр үйл ажиллагаа эрхэлж байгаа ААН-д хяналт шалгаж хийсэн. Энэ үеэр Цэнхэрийн халуун рашааны нөөцийг тогтоогоогүй байхад аялал жуулчлалд ашигласан, дүгнэлт зөвшөөрөлгүй, ус рашаан ашиглах цэгт усны тоолуур байрлуулаагүй, рашааны эрүүл ахуйн болон хязгаарлалтын бүсийг тогтоогоогүй. Хамгаалалтын бүсийг тэмдэглээгүй, халуун рашааны голын онцгой бүсэд газар олгосон зэрэг зөрчил илэрсэн” гэв.