Монгол Улсын хилийн зурвас газраас БНХАУ-д шилжүүлэхээр болсон талаарх мэдээлэлтэйгээр холбоотойгоор Хууль зүй, дотоод хэргийн сайд Х.Нямбаатар мэдээлэл өглөө.

                Тэрбээр “Өчигдөр олон нийтийн сүлжээгээр Монгол Улсын Ерөнхийлөгчийн нууц тушаалаар  Өмнөговь аймгийн нутаг дэвсгэрт байрладаг хилийн отрядыг Гурван тэс сум руу шилжүүлж, улсын хилийн 15 километр газар нутгийг хилийн хяналтаас гаргаж, БНХАУ-ын талд шилжүүлж өгсөн мэт ташаа мэдээллийг нийтэлсэн. Энэ мэдээллийг нийтэлсэн байж болзошгүй хоёр иргэнийг Эрүүгийн цагдаагийн газраас олж шалгалтын ажил үргэлжилж байна. Тиймээс Монгол Улсын хил хязгаарын бүрэн бүтэн байдлыг алдагдуулсан мэдээлэл огт гараагүй. Монгол Улс, БНХАУ-тай 1962 онд хилийн гэрээ байгуулж, 1962-1964 оны хооронд хилийг газар дээр нь тэмдэглэж, 1975 онд Нэгдсэн үндэсний байгууллагад бүртгэгдсэн эргэлтийн цэгийг өөрчлөх боломжгүй. Хил хамгаалах байгууллага өнөөдөр 24 цагаар хил хамгаалах үйл ажиллагааг тасралтгүй явуулж байна. Энэ цаг үед БНХАУ-тай хиллэж байгаа бүх боомт цагийн хуваарийн дагуу үйл ажиллагаагаа явуулж байгаа. Зарим боомт амралтын өдрөөр амардаг, зорчигчийн урсгал нэмэгдэж байгаа. Ташрамд хэлэхэд энэ жил бид ОХУ-тай хойд хилийг шалгах ажлыг эхлүүлсэн. Энэ ажлын хүрээнд ОХУ, Монгол Улстай хиллэж байгаа хилийн тэмдэгтийг бид байгалийн чулуугаар шинэчлэх ажил ч эхэлсэн байна” гэв.