Үерийн эрсдэлтэй бүсэд байгаа “S Outlet” дэлгүүрийн барилгыг албадан буулгах захирамжийг танилцууллаа. Энэ үеэр Нийслэлийн Засаг даргын Эдийн засаг, дэд бүтцийн асуудал хариуцсан нэгдүгээр орлогч Ж.Сандагсүрэн мэдээлэл өглөө.

Тэрбээр “Байгаль орчны ахлах байцаагчийн гаргасан дүгнэлтийг үндэслэж иргэн Д.Батзориг Сүхбаатар дүүргийн нэгдүгээр хорооны нутаг дэвсгэр Сэлбэ голын онцгой хамгаалалттай бүсийн үерийн далан хамгаалалттай газарт 1460700212 нэгж талбайн дугаар бүхий 2407 мкв газар эзэмшүүлсэн, хууль тогтоомж зөрчиж нийтийн ашиг сонирхолд сөргөөр нөлөөлөн Улаанбаатар хотын иргэдийн амь нас, эрүүл мэнд, эрүүл аюулгүй орчинд амьдрах нөхцөлийг алдагдуулж эд хөрөнгөд хохируул учруулах нөхцөл байдал тогтоогдсон тул эрхийг нь түдгэлзүүлж байна. Газар эзэмших эрхийг нь хүчингүй болгосон  талаар мэдэгдэл хүргэж, асуудал шийдвэрлэхийг Батзоригт даалгасан. Иргэн Д.Батзоригийн эзэмшил буюу газар дээр баригдсан байгаа “S Outlet” дэлгүүрийн барилгыг албадан буулгаж, газар чөлөөлөхийг ажлын хэсэгт даалгасан. Мэргэжлийн буулгалтын компани шалгарч барилгыг буулгана. Тухайн үед газар олгох шийдвэр гаргасан төрийн албан тушаалтны буруу байгаа. Нийслэлээс АТГ-т хандаж, хүсэлт өгсөн. Газар олгосон үе үеийн шийдвэр гаргасан хүмүүст хяналт, шалгалтын ажил зохион байгуулахыг хүссэн. АТГ-ын мэргэжилтнүүд буруутай хүмүүсийг хурдан тогтоож чадна. Нөхөн төлбөрийн талаар яригдаж байгаа. Иргэн Д.Батзоригтой уулзаж ,агазр өгөх талаар ярилцсан. Дэлгүүрт ажиллаж байсан иргэд, эзэмшигчийг аль болох маш бага хохиролтойгоор нийтийн эрх ашгийг хангахыг зорьж байна. Өнөөдөр барилга нураахтай холбоотойгоор аюулгүй байдлын хашааг барина”гэв.