Хан-Уул дүүргийн III хороо, үерийн эрсдэлтэй бүсэд байгаа Шунхлай ШТС-д Нийслэлийн Засаг даргын албадан буулгах захирамжийг танилцууллаа. Энэ үеэр Шунхлай  группийн техник хариуцсан захирал н.Гэрэлт-Од мэдээлэл хийлээ.

      Тэрбээр “Манайх мэдэгдлийг хүлээж авлаа. Компанийнхаа зүгээс байр суурь илэрхийлье. Шунхлай групп өнгөрсөн үерийн нөхцөл байдал, Нийслэлийн орлогч даргын хэлсэн асуудлуудыг ойлгож байгаа. Анхнаасаа эсэргүүцээгүй. Бид энэ шатахуун түгээх станцыг нүүлгэн шилжүүлье гэсэн байр суурьтай байгаа. Үүнийгээ албан ёсоор илэрхийлж байна. Мөн энэ шатахуун түгээх станц газар эзэмших, олгох, барилга байгууламж барих, УОК-т хүлээлгэж өгөх бүх үе шат хуулийн дагуу явагдсан. Өнөөдрөөс буулгалтын ажлыг эхэлж, зам, орц гарцыг сэтэлнэ гэж байна.  Энэ байгууламжийн замыг барилгын хүмүүс буулгаж чадахгүй.  Шатахуун түгээх станцыг тусгай хүмүүс зөөх ёстой. Бид шатахуун, шатахууны байгууламжаа авч чадахгүй болно, үүнийг харгалзаж үзэх байх гэж найдаж байна.  Бид эсэргүүцэхгүй байгаа, гэхдээ гэнэт ирээд өнөөдөр буулгана гэж болохгүй. 2013 онд энэ байгууламжийг УОК-т хүлээлгэж өгсөн байдаг” гэлээ.