Хан-Уул дүүргийн III хороо, үерийн эрсдэлтэй бүсэд байгаа Шунхлай ШТС-д Нийслэлийн Засаг даргын албадан буулгах захирамжийг танилцууллаа. Энэ үеэр Нийслэлийн Засаг даргын Эдийн засаг, дэд бүтцийн асуудал хариуцсан нэгдүгээр орлогч Ж.Сандагсүрэн мэдээлэл өглөө.

   Тэрбээр “Үер усны аюултай нөхцөл байдал хэд хэдэн удаа болсон. Үүнээс шалтгаалж иргэдийн амь нас, эрүүл мэнд, эд хөрөнгө хохирлоо. Цаашид үер усны аюулаас сэргийлэхийн тулд хэд хэдэн  захирамжууд бий.  Хан-Уул дүүргийн III хороо, Сэлбэ Дунд голын онцгой хамгаалалтын бүсэд, үерийн далан сувгийн хамгаалалтын газар хууль зөрчиж барилга барьсан нь Улаанбаатар хотын иргэдийн эрүүл, аюулгүй орчинд амьдрах нөхцөлийг алдагдуулж, нийтийн эрх ашигт сөргөөр нөлөөлж,  иргэдийн эрүүл мэнд, амь насанд эрсдэл учруулж болзошгүй байна. Тиймээс Шунхлай ШТС-ийг албан буулгах тухай захирамж гарсан. Захирамжийн дагуу өнөөдрөөс Шунхлай ШТС-ийн үйл ажиллагааг зогсоож, буулгах ажлыг эхлүүлнэ.  Бусад албадан буулгах компаниудтай ч бид уулзаж, асуудлыг хэрхэн шийдвэрлэх талаар ярилцсан. Шунхлай группийн хувьд асуудалд нааштай хандаж байгаа” гэлээ.