Улсын Их Хурлын гишүүн Ц.Сандаг-Очир, Хөдөлмөр, нийгмийн хамгааллын дэд сайд С.Зулпхар, Монгол Улсын Шадар сайдын зөвлөх Б.Мөнх-Оргил болон ХНХЯ-ны удирдлагууд, Багахангай дүүрэгт энэ сарын 21-ний өдөр ажилласан.
         Энэ үеэр тус дүүргийн Гэр бүл, хүүхэд, залуучуудын хөгжлийн хэлтэс, Нийгмийн даатгалын хэлтэс, хөдөлмөр, халамжийн үйлчилгээний хэлтсийн үйл ажиллагаатай танилцаж, ажилтан албан хаагчдын ажиллах орчин нөхцөлийг газар дээр нь үзэж, хүндрэлтэй байгаа зарим асуудлыг шийдвэрлэхээр боллоо.

         Гэр бүл, хүүхэд, залуучуудын хөгжлийн хэлтэс гэхэд гэр бүлд зөвлөгөө өгөх, хүүхдээс мэдүүлэг авах, түр хамгаалах, сэтгэл зүйн ганцаарчилсан зөвлөгөө авах, дугуйлан секц хичээллүүлэх зэрэг үндсэн чиг үүргээ хэрэгжүүлэх боломжгүй байгаа юм. Түүнчлэн хүний эрх, хүүхдийн эрхийг хангаж, түр хамгаалах байраар үйлчлүүлж буй хохирогчид, үйлчилгээ авахаар ирж буй хүүхэд, гэр бүлийн нууцлалыг хангах шаардлагатайг харгалзан батлагдсан зураг төсвийн дагуу “Хүүхэд, гэр бүлийн хөгжлийн төв”-ийн барилгын 2,7 тэр бум төгрөгийн төсвийг 2024 оны төсөвт тусгуулах саналаа хүргүүлж шийдвэрлүүлэхээр боллоо.

Хөдөлмөр, халамжийн үйлчилгээний хэлтсийн тухайд албан хаагчдын ашиглаж буй компьютер техник хэрэгсэл шаардлага хангахгүй болсон талаар танилцуулсан. Дэд сайд С.Зулпхар “Энэ онд багтаан компьютер хэрэгслийг шинэчилж өгнө” гэлээ. Хүн амын тооноос хамааран тус дүүрэг дэх Нийгмийн даатгалын хэлтэс болон, Хөдөлмөр, халамжийн үйлчилгээний хэлтсийн байрыг нэг дор байхаар зохицуулж, барилгын санхүүжилтийг төсвийн саналд тусгаад явна гэлээ. Багахангай дүүрэгт төрийн үйлчилгээний байгууллагын барилга байгууламж барихад газрын олдохгүй гэх хүндрэл үүсэхгүй гэдгийг дүүргийн удирдлагууд танилцуулав