Нүүдэлчин дэлхийн соёлын фестивалийн үеэр хүүхэд багачуудад соёлын биет бус өвийг таниулах, сурталчлах, оролцоог нь хангах олон хөтөлбөр, арга хэмжээг Соёлын яамны харьяа байгууллагууд зарим Төрийн бус байгууллагатай хамтран зохион байгуулжээ.

     Эдгээрийн нэг Нүүдэлчин-хүүхдийн өв соёлын бэсрэг наадмыг Монгол Улсын Хүүхэлдэйн театр Дэлхийн мөрөөдлийн  сургууль, Хилийн чанад дахь Монголчуудын Зөвлөлтэй хамтран зохион байгууллаа. Наадамд  21 аймаг есөн дүүргээс шалгарч ирсэн соёлын биет бус өвийг өвлөн уламжлагч 120 хүүхэд оролцож, өөрсдийн авьяасаа нүүдэлчин олондоо толилууллаа. Мөн Нүүдэлчин дэлхийн соёлын фестивалийг угтаж “Нүүдэлчин-Монгол ахуй, соёл” сэдвээр гар зургийн болон зохион бичлэгийн уралдааныг хилийн чанад дахь 60 гаран сургуулиуд дунд зохион байгууллаа.

    Ташрамд дурдахад Засгийн газрын үйл ажиллагааны хөтөлбөрт тусгагдсан Бүх нийтийн соёлын боловсролыг дээшлүүлэх арга хэмжээний хүрээнд Нүүдлийн соёлын боловсрол олгох олон талт ажлууд хийгдэж байгаа ба тухайлбал, MNS:5633:2023 Хүүхдийн зуслангийн стандартад нүүдлийн соёлын боловсролын агуулгыг тусган шинэчлэн батлуулж, энэ онд Хэнтий аймгийн Цэнхэрмандал сум, Баян-Адарга сум, Дундговь аймгийн Адаацаг сум, Өвөрхангай аймаг, Төв аймагт нүүдлийн зуслангууд шинээр нээгдэн ажиллаж, хилийн чанадаас БНХАУ-ын Өвөр Монгол, Тайвань, ОХУ-ын Буриад, Япон Улс, Франц, ХБНГерман Улс, АНУ, БНСолонгос Улсаас  нийтдээ 200 гаран хилийн чанадад амьдардаг хүүхэд багачууд хүрэлцэн ирж, Монголчуудын нүүдэлчин өв соёл, уламжлалаас суралцан, нүүдэлчин ахуйд амьдран эх хэлний чадвараа шинэ түвшинд хөгжүүлж, бие даан амьдрах, сурах арга барилд суралцсан.

   Энэ оны есдүгээр сард хилийн чанад дахь Монгол боловсрол, соёлын төвийн багш нар болон хүүхдийн зуслангийн багш нарыг хамруулан нүүдлийн соёлын боловсрол олгох багшийг бэлтгэх сургалтыг зохион байгуулахаар төлөвлөж байна.