Дэлхийн дулаарал, цаг агаарын өөрчлөлттэй холбоотой үер усны болзошгүй эрсдэлийн эсрэг хариу арга хэмжээ авах, галт тэрэгний хөдөлгөөний аюулгүй байдлыг хангах ажлын хүрээнд “Улаанбаатар төмөр зам” ХНН-ийн зүгээс төмөр зам үерийн усанд угаагдаж болзошгүй газруудад ус өнгөрүүлэх хоолой, гүүр, нүхэн гарц зэргийг барьж байна. 2023 онд үерийн ус орж ирэх эрсдэл өндөртэй долоон газарт ус өнгөрүүлэх хоолой барихаас гадна хоёр гүүр, хоёр нүхэн гарц барихаар төлөвлөсөн.

           Саяхан Шивээ-Овоо– Шивээ говь өртөө хоорондын 683 км-ийн дөрөвдүгээр зуут болон Шивээ говь-Өлзийт зөрлөг хоорондын 693 км-ийн гуравдугаар зуутад ус өнгөрүүлэх хоолой барьсан юм. Эдгээр эрсдэл өндөртэй газруудад 1957, 1980, 1982, 1984 онуудад зам усанд угаагдаж байжээ. Мөн саяхан үерийн усанд угаагдсан Агуйт–Наран-Элгэн хоорондын замын эрсдэл өндөртэй цэгүүдэд ус өнгөрүүлэх хоолой шинээр нэмж барихаар төлөвлөөд байна.