Тулгар төрийн 2232, Их Монгол Улсын 817, Үндэсний эрх чөлөө, тусгаар тогтнолоо сэргээн мандуулсны 112, Ардын хувьсгалын 102 жил, Ардчилсан хувьсгалын 33 жилийн ойн Үндэсний их баяр наадмын хүчит бөхийн барилдаанд Архангай аймгийн Цэнхэр сумын харьяат Мягмарын Бадарч түрүүлж, улсын арслан болсон билээ. Өнгөрсөн өдрүүдэд улсын арслан М.Бадарчийн допингийн шинжилгээний хариунаас бусад бөхчүүдийн хариу ирсэн талаар мэдээлэл бий. Мөн М.Бадарчийн допингийн шинжилгээний хариу эргэлзээтэй учраас ирээгүй байгаа гэсэн таамаг цахим сүлжээнд яригдаж байгаа. Энэ талаар улсын арслан М.Бадарчтай холбогдож тодрууллаа.

        Тэрбээр "Би допингийн шинжилгээний хариундаа огт эргэлзэхгүй байна. Арслан цолныхоо мялаалга наадмыг төрөлх нутаг Архангай аймгийн Цэнхэр сумандаа хийчхээд буцаж явна. Дөнгөж сая сүлжээнд орж байгаа учраас олон нийтийн сүлжээнд цацагдсан мэдээллийг бүрэн харж амжаагүй байна. Допингийн шинжилгээг нэрээр биш тусгай кодоор авдаг учраас хэний хариу ирсэн, гарсан гэдгийг мэдэх боломжгүй байдаг шүү дээ. Ийм мэдээлэл яагаад гарсныг мэдэхгүй байна" гэлээ.