Үерийн гамшигт ажиллаж байгаа албан хаагчид хэрхэн халдвар хамгааллын дэглэмээ баримталж байгаа талаар Нийслэлийн эрүүл мэндийн газрын дарга П.Эрхэмбулган мэдээлэл өглөө.

            Тэрбээр  “Үерийн гамшгийн үйл ажиллагаанд өдөрт 1000 гаруй албан хаагч чиглэл чиглэлийн үүргийг хэрэгжүүлэн ажилласан. Албан хаагчид дөрвөн хоног тасралтгүй ажиллаж байна. Иймээс байрлаж байгаа штаб дээр нь халдвар хамгааллын дэглэмийг баримталж, гамшгийн ажиллагаанд оролцож байгаа албан хаагчдыг хувийн хувцас хэрэгслээр хангах, ахуйн халдвар хамгааллын зөвлөгөөг өгөх, ажиллагаанд оролцож ирсэн албан хаагчдад халдваргүйтгэлийг хийж ажилласан. Үерийн дараа халдварт өвчний тоо их нэмэгддэг, энэ жилийн хувьд өмнөх жилтэй харьцуулахад нэмэгдсэн зүйл байхгүй байна. Гэхдээ ард иргэд халдвар хамгааллын дэглэмээ баримталж, хувийн ариун цэврээ баримтлах хэрэгтэй. Хэрэв дотор муухайрах, толгой өвдөх, суулгах, бөөлжих, халуурах шинж тэмдэг илэрвэл эрүүл мэндийн байгууллагад хандах хэрэгтэй. Цаашлаад үерийн голомтод байгаа өрхүүдэд зөвлөмж өгч ажилласан. Шуурхайн штаб дээр байрлаж ажилласан албан хаагчдаас гадна сайн дураараа ирж тусалж байгаа хүмүүс бий. Эдгээр иргэдэд мөн халддвар хамгааллын дэглэмийн зөвлөгөө өгөн ажиллаж байна. Одоогийн байдлаар үерийн голомтод ажиллаж байгаа иргэдээс халдварын шинж тэмдэг илрээгүй байна. Харин ажиллагаанд оролцсон албан хаагчдын 16 хүнээс гэдэсний халдварт өвчний шинж тэмдэг илэрсэн. Хөнгөн болон хүнд гэсэн оноштой байгаа, зарим нь ХӨСҮТ-л хэвтэн эмчлүүлж байгаа. Гэдэсний халдварт өвчний хамгийн түгээмэл нь халуурах, суулгах, дотор муухайрах, бөөлжих, булчин татах шинж тэмдэг илэрдэг. Үерийн голомтод байгаа айл өрхүүдэд шуурхай штабаас тогтмол халдваргүйжүүлэлтийг явуулж байаа. Өдөрт хоёр удаагийн давтамжтайгаар айл өрх, гудамж талбайг халдваргүйжүүлж байгаа. Одоогийн байдлаар 50 мянга гаруй мкв  гудамж талбайг халдваргүйжүүлсэн. Мөн 205 айл өрхөд халдваргүйжүүлэлтийг хийж байгаа” гэв.