Галт зэвсэг ашиглаж, иргэд рүү буудсан хэргийн талаар цагдаагийн газраас мэдээлэл өглөө.

        Нийслэлийн цагдаагийн газрын Мөрдөн шалгах газрын Хүнд гэмт хэрэгтэй тэмцэх хэлтсийн дарга, дэд хурандаа О.Одонбаатар “Цагдаагийн байгууллагад энэ сарын 7-ны 21:00 цагийн орчимд Баянзүрх дүүргийн VI хороонд байрлах цахим тоглоомын газарт хүн бусдад хутгалуулсан гэх дуудлага ирсэн. Дуудлагын дагуу цагдаагийн байгууллагаас шалгахад 39 настай Б нь 33 настай У-г хутгалж хэргийн газраас зугтсан байсан. Албан хаагчид шуурхай эрэн сурвалжилж, 40 минутын дараа 39 настай эрэгтэй Б-г Бөхийн өргөөний хажууд байрлах 22 дугаар байрнаас олж тогтоосон. Цагдаагийн албан хаагчдыг очиход иргэн Б хоёр гартаа хутга барьсан, хутгаа скотчихсон байсан учир хоёр цагийн хугацаанд хэлэлцээ хийсэн. Иргэн "Хүүтэй минь уулзуулчих, би нэгэнт шийдсэн хүн" гэх зүйлийг ярьж байсан. Албан хаагчдын зүгээс "Гартаа байгаа хутгаа хураалгачих юм бол уулзуулна" гэхэд шаардлагыг биелүүлээгүй учир резинэн буу ашиглаж иргэнийг саатуулсан" гэв.