Зоонозын Өвчин Судлалын Үндэсний Төвийн Тархвар судлагч эмч Г.Ганбилэгээс  мал, амьтнаас хүнд халддаг, халдварт өвчний тархалтын талаар тодрууллаа.

    Тэрбээр “Он гарсаар улсын хэмжээнд зоонозын халдварын хүний өвчлөлийн сэжигтэй байж болзошгүй нийт 743 яаралтай дуудлагыг хүлээн авч, хариу арга хэмжээг хэрэгжүүлэн ажилласан. Өмнөх оны мөн үетэй харьцуулахад дуудлага өссөн үзүүлэлттэй байна. Ялангуяа хачигт халдварын дуудлага 50-60 хувийг эзэлж байна. Хачигт халдварын хувьд юуны өмнө вакцин хийлгэж болохоос гадна тод өнгийн хувцас өмсөх нь хамгийн энгийн арга зам байдаг. Хачигт хазуулснаас өндөр хэмтэй халуурах, огиулж бөөлжих, толгой, булчин, хүзүү нуруугаар өвдөх зэрэг анхны шинж тэмдэг илэрдэг. Хачигт халдварын идэвхжил 5-7 дугаар сард эрс нэмэгддэг. Тиймээс ой мод, өндөр өвс ногоотой газраар алхах, аялж зугаалахдаа болгоомжтой байх. Дээрх шинж тэмдгүүд илэрвэл эрүүл мэндийн байгууллагад хандах хэрэгтэй.

             Мөн Говь-Алтай аймгийн Бугат суманд тарваган тахлын хүний өвчлөл бүртгэгдсэн. Бид тарваган тахлаас сэргийлэх үйл ажиллагааг зөвхөн энэ жил биш жил бүр тогтмол зохион байгуулдаг. Гэсэн ч иргэд хайхрамжгүй хандсаар байна. Мөн тарваган тахлын улирлыг 8-9 сар хамгийн оргил үе гэж үздэг. Тарваган тахлаас урьдчилан сэргийлэх хамгийн гол арга бол хориотой энэ ан амьтныг агнахгүй байх, өвчилсөн сэг зэм тааралдах юм бол яаралтай мэргэжлийн байгууллагад хандах хэрэгтэй" гэлээ.