Монгол Улсын Хөдөлмөрийн баатар, Гавьяат тамирчин, олимпын наадмын мөнгөн медальт, дэлхийн аваргын хүрэл медальт, даяар дуурьсагдах далай, даян, дархан аварга Жигжидийн Мөнхбатын гэрэлт хөшөөг түүний төрөлх Төв аймгийн Эрдэнэсант суманд сүндэрлүүлжээ. Тухайлбал, Төв аймгийн Эрдэнэсант сумын түүхт 100 жилийн ойн баяр наадам болж байгааг тохиолдуулан Сант нутгаас төрөн гарсан үндэсний бөхийн домогт аваргынхаа гэрэлт хөшөөг сумын ерөнхий боловсролын сургуулийн өмнө сүндэрлүүлсэн байна.

Домогт аварга Ж.Мөнхбат 1941 оны зургадугаар сарын 1-нд Төв аймгийн Эрдэнэсант сумын Хадан хошуу гэх газар Чанцал, Хажид нарын гэр бүлийн 10 дахь хүү нь болон төрсөн. Харин түүнийг төрөөд удаагүй байхад нь нагац ах Жигжид нь үрчилж авчээ. Ж.Мөнхбат Эрдэнэсант сумынхаа долоон жилийн сургуулийг төгсөөд Санхүүгийн техникум, Эдийн засгийн дээд сургуульд тус тус суралцсан бөгөөд 1960 онд буюу Санхүүгийн техникумд сурч байхдаа сумын заан болж, ердөө ганцхан жилийн дараа Ардын хувьсгалын 60 жилийн ойгоор улсын заан цол хүртэж байв.

                    Тэрээр монгол төрийн үндэсний их баяр наадамдаа зургаан удаа түрүүлж, даяар дуурьсагдах далай, даян, дархан аварга болсон цөөн домогт бөхийн нэг. Тухайлбал, 1963 онд улсын арслан У.Мижиддоржийг өвдөг шороодуулж, улсын арслан цол, 1964, 1965 онд Ч.Бээжин аварга, Х.Баянмөнх аваргыг давж, аварга болсон. Улмаар 1966, 1967, 1964 онд онд дархан аварга Д.Дамдин, дархан аварга Х.Баянмөнх нарыг давж, улсын баяр наадмын манлай бөх болж байв. Тэрээр улсын баяр наадмын хүчит бөхийн барилдаанд нийт зургаан удаа түрүүлсэн бөгөөд монгол бөхийн түүхэнд гуравт орох бахдам амжилт үзүүлсэн байдаг.

                        Домогт Ж.Мөнхбат аварга үндэсний бөх төдийгүй чөлөөт бөхийн спортод бахдам амжилт гаргаснаас онцолбол, олимп, дэлхийн аварга шалгаруулах тэмцээний анх медалийг эх орондоо авчирсан. Тэрээр 1967 онд болсон Шинэ Делигийн чөлөөт бөхийн ДАШТ-ээс хүрэл медаль, 1968 оны Мехикогийн олимпоос мөнгөн медаль хүртэж, монгол түмэндээ хүндлэгдсэн цэнгэлийн манлай домогт бөх билээ.