Хүнсний хангамж, аюулгүй байдал буюу Хүнсний хувьсгал хөдөлгөөний хүрээнд хүнс үйлдвэрлэгчдэд хөнгөлөлттэй зээл олгохоор болсон.

   Энэ хүрээнд хүнс, хөдөө аж ахуйн үйлдвэрлэл эрхлэгч иргэн, аж ахуй нэгж, хоршоодод эргэлтийн хөрөнгийн болон хөрөнгө оруулалтын зээлийг 5-6 хувийн хүүтэй, 3-5 жилийн хугацаатайгаар олгоно. Тухайлбал, мал аж ахуйн үйлдвэрлэлд 132.3, газар тариалангийн үйлдвэрлэлд 342.6, хүнсний боловсруулах, сав баглаа боодлын үйлдвэрлэлийг дэмжихэд 507.1 тэрбум төгрөгийн нийт 982 тэрбум төгрөгийн зээлийг банкны эх үүсвэрээс олгохоор шийдвэрлэсэн.

    Үүний дагуу эхний ээлжид 4.7 тэрбум төгрөгийн хөнгөлөлттэй зээл олгохоор болжээ. Хүнсний хангамж, аюулгүй байдлыг хангах талаар авах зарим арга хэмжээний тухай УИХ-ын  тогтоолоор батлагдсан төлөвлөгөөний дагуу Хүнс, Хөдөө аж ахуй, хөнгөн үйлдвэрийн сайдын өнгөрсөн зургадугаар сарын 30-ны тушаалаар дараах салбар чиглэлд хөнгөлөлттэй зээл олгохоор шийдвэрлэжээ.

• Жимс, жимсгэний төрөлжсөн аж ахуй
• Төмсний супер-элит үр үйлдвэрлэл
• Загвар хоршоо
• Мах болон нарийн ноост үржлийн цөм сүргийн аж ахуй
• Нийслэлээс орон нутагт шилжин суурьшсан аж ахуйн нэгжид хөнгөлөлттэй зээл олгох

      Дээрх чиглэлээр хөнгөлөлттэй зээл авах хүсэлтэй иргэн, аж ахуйн нэгжүүдийн хүсэлтийг авч эхэллээ. Зээлийн материалыг нэг сарын хугацаанд буюу ирэх наймдугаар сарын 19-нийг хүртэл хүлээн авах юм байна. Төслийн материалыг Жижиг, дунд үйлдвэрийн газрын https://sme.gov.mn цахим хаягаар хүлээн авах ажээ.