ОБЕГ болон ЦУОШГ-аас үер, усны нөхцөл байдлын талаар мэдээлэл хийлээ.

      Энэ үеэр ОБЕГ-ын дэд дарга, бригадын генерал Б.Ууганбаяр “Үндэсний их баяр наадам сайхан болж өндөрлөлөө. Гэвч энэ үеэр хүчтэй аадар бороо орох, үер, ус нэмэгдэх тохиолдол олон гарлаа. Улаанбаатар хотод өнгөрсөн хугацаанд тохиолдсон үерийн гамшгийн асуудалд хэрэгжүүлсэн арга хэмжээ, орон нутагт тохиолдсон үер, усны  гамшгийн талаар мэдээлэл, сэрэмжлүүлэг өгье.  Мөн сүүлийн үед усны ослын тоо нэмэгдэж байна. Нийслэлийн 26 хорооны 31.6 мянган өрхийн 128.1 мянган хүн үерт өртсөн. Үерийн даланг хүчитгэх үүднээс 80 мянган шуудай, 900 мкб  элс, шороо, хайргыг байрлуулах ажилд 300 орчим машинаар ажиллаа. Мөн орон сууцны усыг зургаан хоногийн турш соруулсан. Одоогийн байдлаар Баянзүрх дүүрэгт ус соруулах ажлыг үргэлжлүүлэн хийж байна.  Үерт өртсөн газруудад цэвэрлэгээ, халдваргүйжилтыг хийж, иргэдийн цахилгаан хангамжийг шалгаж, холбосон. Энэ үйл ажиллагаанд нийтдээ 14 мянга 300 орчим алба хаагч ажиллаа” гэлээ.