Хүннү гүрний 2232, Их Монгол улсын 817, Үндэсний эрх чөлөө, Тусгаар тогтнолоо сэргээн мандуулсны 112, Ардын хувьсгалын 102 жилийн ойн баяр цэнгэл наадам хязаалан насны морины уралдаанд түрүүлж айрагдсан морины унаач хүү М.Мянганзулын баярын сэтгэгдлийг хүргэж байна.

Тэрбээр “Би Өмнөговь аймгийн Булган сумын ерөнхий боловсролын сургуулийн тавдугаар ангид сурдаг. Үнэхээр их баяртай байна. Би гурван жил морь унаж байна. Энэ хугацаанд улс, бүсийн уралдаанд гурав орсон. Бүсийн уралдаан хээр даагатай унаж, түрүү авсан. Мөн өнгөрсөн жилийн наадамд оролцож, айргийн тавд орсон. Анх удаа наадмын уралдаанд түрүү авлаа. Аав, ээж хоёр минь намайг уралдахаар явахад сайн яваад ирээрэй гэж захидаг. Би өмнө жил хязаалан, сонгомол бага, монгол даага насны морьд унасан. Би ахынхаа уясан морийг энэ өвлөөс эхлэн унаж байгаа. Манай ангиас морь унадаг хүүхдүүд олон байгаа. Найзууддаа уралдаанд нь амжилт хүсье. Уралдаад хэддүгээр байрт орох бол гэж их догдлоод шөнө унтаж чадаагүй. Одоо шүдлэн насны морь унана" гэв.