2023 оны долдугаар сарын 06-ны 20:00 цагийн Цаг уур, орчны шинжилгээний газраас хийсэн прогнозоор Тэрэлж-Тэрэлж харуул буюу Тэрэлж орчмоор усны түвшин 16 цагийн өмнөхөөс огцом /30 см/нэмэгдэн хүчтэй үерлэж, үерийн аюултай түвшинг 30 см даваад байна. Туул-Улаанбаатар харуулаар мөн 16 цагийн үеийнхээс гурван см-ээр нэмэгдсэн бөгөөд үерийн түвшинг 50 см давж үерийн аюултай түвшинд (260 см) хүрэхэд таван см үлдээд байна.

     Тэрэлж-Тэрэлж харуулын мэдээгээр хийсэн прогнозоор маргааш Улаанбаатар хотоор дайран өнгөрөх Туул голын түвшин 270 см хүрч, үерийн аюултай түвшинг 10 см давах төлөвтэй байна. Харин Тэрэлжээс Улаанбаатараар дайран өнгөрөх Туул голын үерийн урсах хугацаа урьдчилсан тооцооллоор нэг хоног үргэлжлэх аж.

Иймд иргэд, олон нийт үерийн аюулаас сэрэмжилж, үер усны зам, голын голдирол, гуу жалга, ус хальдаг эрэг дагуу амарч зугалах, хүүхдээ тоглуулахгүй байх, хүүхэд, жирэмсэн эх, өндөр настан, хөгжлийн бэрхшээлтэй хүмүүсийг аюулгүй газар байлгаж, цахилгаан хэрэгслийг хүчдэлээс салгах, шаардлагагүй тохиолдолд аян замд гарахгүй байхыг онцгойлон анхааруулж байна.