Сэлбэ голын далан сэтэрсний улмаас ойролцоох орон сууцууд усанд автаад байгаа билээ. Тэгвэл өчигдөр буюу долдугаар сарын 5-нд барьсан далан сэтэрч ойролцоох орон сууцуудаа устуулаад байгаа. Үерийн далан сэтэрсэний улмаас Үйлдвэрчин хотхоны 60 дугаар байрны В1 давхар усанд автсан бөгөөд ААН-үүд эд хөрөнгөөрөө хохирч байгаа аж. Ингээд тус орон сууцанд хувиараа бизнес эрхлэгч Ю.Тэгшжаргалтай холбогдож нөхцөл байдлын талаар тодрууллаа.

       Тэрбээр “Гамшгийн байдалд хүрчихлээ. Нэг барилгын В1 давхраас нэг давхраас хүртэл усанд автчихсан байдлыг гамшиг гэх байх. Өчигдөр цөөн хэдэн байр усанд автчихсан байсан бол өнөөдөр хүрээгээ тэлж, олон байр болсон. Өчигдөр усанд автсан давхрынхан өөрсдөө усаа соруулж, шавхсан. Өглөө 06:00 цагт бүх усаа шавхаад, хатаасан. Онцгой байдлын албаныхан ч хаалт, далан босгосон учраас дахиж ус орж ирэхгүй гэж хэлсэн. Гэтэл өглөө 07:30 цаг болж байхад “Далан сэтэллээ, танай байр руу ус орохоос өөр арга байхгүй” гэж хэлээд сэтэлсэн. Шууд цонхоор ус орж ирээд живчихдэг юм байна. Урьд орой нь амжихгүй шүү, бид найдвартай хамгаалалт хийж чадаагүй шүү гэж хэлсэн бол В1 давхарт үйл ажиллагаа явуулдаг ААН-үүд зөөх ёстой зүйлсээ зөөгөөд арга хэмжээ авчихна шүү дээ. Ус шавхаж, өөрсдийнхөө техникийг зөөж чадаагүйгээс болоод өнөөдөр бүх зүйлээ усанд автуулчихлаа. Тавилгадаа дарагдчихсан хүнийг цонхыг нь хаглаж байгаад аварлаа. Хүнээ аварсны дараа онцгой байдлын албаныхан ирсэн. В1 давхар нь усанд автчихсан байхад дээд давхрын айлуудад гамшгийн хэмжээнд хүрээгүй гэсэн мэдээлэл түгээж байна” гэв.