Нийслэлийн Онцгой байдлын газрын дарга, Онцгой комиссын орлогч дарга, хурандаа А.Дашням өндөржүүлсэн бэлэн байдал, үүсэж  буй нөхцөл байдлын талаар мэдээлэл өглөө.

          Тэрбээр “Цаг үеийн нөхцөл байдлаас шалтгаалж Нийслэлийн онцгой комисс 10:00 цагт шуурхай хуралдсан. Үүнтэй холбоотойгоор Нийслэлийн Засаг даргын долдугаар сарын 5-ны өдрийн захирамжаар нийслэлийн төвийн зургаан дүүргийг өндөржүүлсэн бэлэн байдалд шилжүүлсэн. Өндөржүүлсэн бэлэн байдалд шилжүүлснээр төрийн болон төрийн захиргааны чиг үүргийн албан хаагчдыг дайчлан ажиллуулах, зарим эрхийг хязгаарлах ажил хийгдэнэ. Мөн Нийслэлийн Засаг даргын тамгын газар дээр шуурхай штаб 24 цагаар ажиллаж байна. Дүүргүүдэд үүсэж байгаа нөхцөл байдалд дүүргийн дарга нар арга хэмжээ авах, сэргээх арга хэмжээ авна. Өндөржүүлсэн бэлэн байдлыг хугацаагүйгээр зарласан” гэв.