Шүүгдэгч Л.Г, Ц.Т нар Хэнтий аймгийн Баян-Адарга сумаас өнгөрсөн оны есдүгээр сарын 4-5-ны хооронд Т.Б-ын 44 ишиг, есөн хурга, Ж.Э-ын гурван бүдүүн хонь болон Т.Б , Ж.Э нарын 56 бог мал хулгайлжээ. Тэд хулгайлсан малаа ногоон өнгийн будгаар будаж, тэмдгийг нь өөрчилсөн байна. Мөн найман ишгийг машинд тээвэрлэж Н.Г-н хонин сүргэнд нийлүүлжээ. Ингэснээр олон тооны мал хулгайлж, Т.Б-т 2.120.000 төгрөг, Ж.Э-д 570.000 төгрөг нийт 2.690.000 төгрөгний хохирол учруулсан байна. 

     Шүүгдэгч Б.Д нь 56 тооны бог малыг гэмт хэргийн улмаас олсон мал хөрөнгө гэдгийг мэдсээр байж түүний хууль бус эх үүсвэрийг нь нуун далдалж, найман ишгийг 2021 оны есдүгээр сарын 22-ны өдөр машинд тээвэрлэж Н.Г-н хонин сүргэнд нийлүүлж, Л.Г, Ц.Т нарыг хуулийн хариуцлагаас зайлсхийхэд туслах зорилгоор малын байршлыг өөрчилж, Т.Б-т 2,120,000 төгрөг, Ж.Э-д 570,000 төгрөг, нийт 2,690,000 төгрөгний хохирол учруулсан гэмт хэрэгт тус тус холбогджээ.

     Эрүүгийн хуулийн тусгай ангийн 17.12 дугаар зүйлийн 2 дахь хэсгийн 2.1, 2.2 дахь заалтад зааснаар шүүгдэгч Л.Г-д хоёр жил зургаан сарын хугацаагаар хорих ялаар, Ц.Т-д хоёр жилийн хугацаагаар хорих ялаар шийтгэж, оногдуулсан хорих ялыг нээлттэй хорих байгууллагад эдлүүлэхээр шийдвэрлэсэн байна.