Нийслэлийн Хэвлэл мэдээлэл, олон нийттэй харилцах хэлтэст энэ жил 2.8 тэрбум төгрөг төсөвлөсөн гэх мэдээлэл гарч, олны бухимдлыг хүргэсэн. Энэ талаар нийслэлийн Хэвлэл мэдээлэл, олон нийттэй харилцах хэлтсийн дарга Г.Хонгорзулаас тодрууллаа.

Тэрбээр “Хэвлэл мэдээлэл, олон нийттэй харилцах нэгж Нийслэлийн Засаг даргын тамгын газрын харьяанд байсан. Энэ жил нийслэлийн зарим хууль шинэчлэн батлагдсантай холбоотойгоор Нийслэлийн засаг, захиргааны байгууллагуудад өөрчлөлт орсон. Үүний хүрээнд 2022 оны нэгдүгээр сараас Нийслэлийн сургалт, судалгаа, Олон нийттэй харилцах газар болсон. 2.8 тэрбум төгрөг төсөвлөхөөр ярьж байгаа. Үүнд урсгал зардал буюу ажилчдын цалин, цахилгаан, байрны төлбөр багтсан.

Харин Хэвлэл мэдээлэл, олон нийттэй харилцах чиглэлээр жил бүр 750 сая төгрөг баталдаг. Гэхдээ энэ жил төр, Хяналтын тухай хуулиар 500-600 сая төгрөг төсөвлөх санал оруулж байгаа. Тэгэхээр зөвхөн хэвлэл мэдээлэлд 2.8 тэрбум төгрөг зарцуулахгүй гэсэн үг.

Нийслэлийн Засаг даргын Тамгын газарт төрийн захиргааны 34 байгууллага ажилладаг. Тэдний хэвлэл мэдээлэл, олон нийттэй харилцах чиг үүргийг манай агентлаг хэрэгжүүлдэг.  Засгийн газрын хуралдаанаар нийслэлийн бүтцийн асуудлыг хэлэлцэж байгаа. Засаг даргын зөвлөлийн хурлаар сургалт судалгаа, олон нийттэй харилцах хэлтсийг татан буулгах шийдвэр гаргахаар ярилцаж байгаа. Тиймээс зарим чиг үүрэг давхардах, зардал өндөртэй байгууллагуудыг татан буулгах хүртэл арга хэмжээ авч ажиллахыг Засгийн газраас үүрэг болгосон” гэлээ.