Намрын сэрүүхэн өдөр сэтгэл дулаацуулах ном унших сайхан. Иймээс Улаанбаатар хотод онцлох таван номын дэлгүүийг санал болгож байна. Номын “хорхойтнууд” минь хүлээн авч уншаарай.

NINE BOOK STORE

      Байгуулагдаад удаагүй байгаа тус дэлгүүр нь номтой амьдралын хэв маягийг түгээн дэлгэрүүлэх зорилготой. Түүнчлэн, 350-400 нэр төрлийн, хамгийн сүүлийн үеийн чанартай бүтээлүүд дундаас худалдан авагч сонголтоо хийх боломжтой.  Завгүй амьдралын хэв маяг зонхилсон энэ үед хэвлэгдсэн ном бүрийг уншиж амжихгүй. Иймээс минимал орчинг энэ номын дэлгүүр бий болгожээ. Кофены хувьд ч тэр хүмүүсийн өргөнөөр хэрэглэж заншсан американо, латте гэсэн хоёр төрлийн сонголттой юм.

BOOK IN ENGLISH

    Өдгөө хүн бүр өөрсдийн боловсролд анхаарал хандуулж, залуусын ихэнх нь англи хэлээр ярилцаж, дуртай номоо болж өгвөл дэлхийн хэлээр унших эрмэлзэлтэй болсон билээ. Тиймээс ч англи хэл дээрх цорын ганц төрөлжсөн номын дэлгүүр гэдгээрээ "Book In English" онцлог, давуу талтай. Дэлхий дахинаа борлуулалтаараа тэргүүлдэг сонгодог зохиол бүтээлүүдийг дэлхийн хэлээр унших боломжийг тус дэлгүүр олгодог.

"Book In English" нь 2003 оноос эхлэн англи номын худалдаалж эхэлсэн ба одоогийн байршилдаа 12 жилийн турш тасралтгүй үйл ажиллагаагаа явуулж байна. Одоогоор тус номын дэлгүүр шинэ, хуучин төрөл бүрийн 3000 орчим ном бий.

ALPHA BOOK

Alpha Book номын дэлгүүр нь өнгөрсөн 2019 онд нээлтээ хийсэн бөгөөд өдгөө дөрвөн салбартайгаар үйл ажиллагаагаа явуулж байна. Хүмүүс номын дэлгүүрт биечлэн очиж ном худалдан авах нь элбэг болсон тул дэлгүүрийн хамт олон дотоод засал, үйлчилгээний соёлыг эхнээс нь тун нарийн шийдэж, пянзны худалдаа, хөгжим сонсонгоо ном унших бяцхан буланг уншигчдадаа нээж өгсөн байдгаараа онцлогтой. Та дуртай пянзаа тоглуулан хөгжмийн аянд уярч, дуртай номоо сонгон унших боломжийг нэг дороос авна гэсэн үг.

Мөн эко хэрэглээг эрхэмлэж гялгар уутны хэрэглээнээс бүрэн татгалзсан бөгөөд хүргэлтийн савлагаа боодлыг дахин боловсруулан хэрэглэх боломжтой цаасан боолтод шилжүүлжээ. Үүнээс гадна захиа бичих болон, кофены булан байх бөгөөд хайртай нэгэнтэйгээ холбогдож болох, яг л кинон дээр гардаг шиг телефон утасны бүхээгтэй.

        Үнэг номын мухлаг

“Үнэг” мухлагт худалдаалж буй номын 30-40 хувь нь яруу найргийн ном аж. Номын мухлаг учраас зөвхөн худалдааг чухалчлахгүй, шинэлэг байна гэдгээ нээлтийн өдрөө яруу найргийн уншлагатай эхлүүлснээр илэрхийлсэн. Түүнээс хойш зохиолчдоо дэмжсэн, оюуны хөдөлмөрийг үнэлэгч хэн бүхэнд өгөөжтэй ажлуудыг санаачлан, хэрэгжүүлж байгаа аж. Тухайлбал, “Уран бүтээлчийн 7 хоног”-ийг санаачилж, эхний эвэнтээ Төрийн шагналт зохиолч, Ардын уран зохиолч Сормууниршийн Дашдооровын амьдрал, уран бүтээлээр эхлүүлсэн. Ингэхдээ зохиолчийн уран бүтээл, амьдарсан он цаг, намтар түүхийг уншигчдад хүргэхийг зорьжээ. Түүнчлэн, үйлчлүүлж буй хүмүүс нь хоорондооо ярилцаж, үзэл бодлоо солилцож болдогоороо давуу талтай.

BOOK HOUSE

   Дулаахан өнгө аясыг дотроо шингээж, номын худалдаагаа явуулдаг дэлгүүр бол Book house номын дэлгүүр юм. Дотоод засал, үйлчилгээний соёлыг эхнээс нь тун нарийн шийдэж, өнгөлөг орчинг бий болгосноороо давуу талтай.