ОХУ-ын иргэн монгол залуугийн толгойг алхаар цохисон хэрэг өчигдөр гарсан. Тэгвэл энэхүү хэрэгтэй холбоотойгоор Цагдаагийн ерөнхий газрын Хэвлэл мэдээллийн төвийн дарга Б.Баатархүү мэдээлэл өглөө.

   Тэрбээр “Гадаад улсын иргэд гэмт хэрэг үйлдээд, хэв журмын нөхцөл байдал хүндэрсэн асуудал байхгүй байна. ОХУ-ын иргэнтэй холбоотойгоор өчигдөр цахим орчинд ар гэрээс нь мэдээлсэн. Үүнийг Цагдаагийн ерөнхий газрын Хэвлэл мэдээллийн төвөөс албаны эх сурвалжийн мэдээлэл өгсөн. Зөрүүтэй мэдээлэл гарсан байна лээ. Бодит зүйл гэвэл, энэ сарын 22-23-нд ОХУ-ын иргэн Д Монгол Улс руу ирсэн. Гэхдээ хил дээр танилцсан иргэнтэй хамт байрыг нь түрээслэхээр ирээд, тухайн манай улсын иргэний байрны танил болох Г-ийн гэрт орсон байгаа юм. Үндсэндээ дөрвүүлээ байсан. Одоо шалгалтын ажиллагаа үргэлжилж байна. Эхний байдлаар тухайн хүмүүс согтууруулах ундааны зүйл хэрэглээд, анх танилцсан найзтайгаа гараад явсан гэж тайлбарлаж байгаа. Ингэхдээ Монгол Улсын иргэн Д, ОХУ-ын иргэн Г нар үлдсэн. Ингээд Г-ийн биед халдсан байж болзошгүй нөхцөл байдал тогтоогдож байгаа. ОХУ-ын иргэн Д шүүгчийн зөвшөөрөлгүйгээр 48 цаг саатуулах арга хэмжээг өчигдөр авсан. Тухайн үед хамт архи уусан Монгол Улсын хоёр иргэнг мөн саатуулсан байгаа. Одоо мөрдөн шалгах ажиллагаа явагдаж байгаа. Тухайн гэмт хэрэг үйлдэх болсон шалтгаан нөхцөл ажиллагааны явцад илүү тодорхой болох байх” гэв.