Киргизстан, Тажикстаны нутагт орших Памирын нурууны Ленин 7134 метр оргилд ганцаарчилсан авиралт хийхээр явсан "Цэгц" клубийн уулчин Х.Бумхишигийн хөл 5800 метрт хөлдөж, ууланд гацсан харамсалтай мэдээлэл энэ сарын 7-нд гарсан. Түүнийг Монголын уулчдын Үндэсний холбооны Аварга ажиллагаа эрсдэлийн удирдлага хариуцсан дэд ерөнхийлөгч С.Ганхүү, “Жаргалант” клубийн уулчин Э.Даваадорж нар очиж аварсан билээ. Ингэхдээ Х.Бумхишигийн сэтгэл зүйг нь тайвшруулж, биеийн байдлыг нь хянаж, халуун хоол, цай болон анхан шатны тусламж үзүүлж, уулнаас буулгасан байдаг. Түүний биеийн байдал ямар байгаа талаар өөрөөс нь тодруулахад “Эмнэлэгт хоёр сар хэвтэхээр болсон. Манай клубийнхэн тусламж, дэмжлэг үзүүлж байгаа” гэв.