Таван иргэн бүлэглэн 26 настай залууг шатаасан байж болзошгүй хэрэг гарсан талаар бид өмнө нь мэдээлсэн.

    Энэ талаар Цагдаагийн Ерөнхий газрын Хэвлэл мэдээллийн төвийн чиглэлийн ахлах мэргэжилтэн Б.Дэлгэрхангай "Цагдаагийн байгууллагад энэ сарын 16-ны 21:21 цагт Чингэлтэй дүүргийн 11 дүгээр хорооны нутаг дэвсгэрт “Гудамжинд хүнд зодуулсан хүн хэвтэж байна” гэх дуудлага Чингэлтэй  дүүрэг дэх цагдаагийн газрын хоёрдугаар хэлтэст ирсэн. Дуудлагын дагуу шалгахад, 26 настай Б гэгчийг фэйсбүүкээр танилцсан 16 настай, эмэгтэй Р гэгч нь тус хороонд байрлах нийтийн байранд дуудан уулзаж, 15 настай иргэн Э, 21 настай иргэн Т, 25 настай иргэн Э, 17 настай иргэн У нарын хамт бүлэглэн дээрэмдсэн хэрэг гарлаа. Ингэхдээ хохирогчийн бугуйн цаг, гар утас, банкны карт зэргийг дээрэмдэн, банкны картын нууц дугаарыг хэлүүлэхийн тулд хохирогчийн хувцсыг нь тайлж нүцгэлэн зодож, улмаар дээрээс нь шатамхай будаг шингэлэгч цацаж, гал тавин шатаан, хэргийн газраас зугатсан нөхцөл урьдчилсан байдлаар тогтоогдсон.

   Цагдаагийн алба хаагчид тухайн хэргийг үйлдсэн этгээдүүдийг шуурхай эрэн сурвалжилж, Баянзүрх дүүрэгт байрлах шөнийн цэнгээний газраас дайчлан баривчилж хойшлуулшгүй ажиллагааны хүрээнд Шүүхийн шийдвэр гүйцэтгэх ерөнхий газрын харъяа цагдан хорих 461 дүгээр ангид 48 цаг баривчилсан. Ингэхдээ энэ сарын 19-ний өдөр Эрүүгийн хуулийн 17.2 дугаар зүйлд зааснаар эрүүгийн хэрэг үүсгэж, яллагдагчаар татаж, цагдан хорих саналыг шүүхэд хүргүүлэн, Т-г 30 хоног, өчигдөр Э, Э нарыг тус бүр 30 хоног яллагдагчаар цагдан хорих, Р болон У нарыг цагдан хорих тухай прокурорын саналыг хүлээн авахаас татгалзаж суллах тухай шүүхийн шийдвэр гарсан тул яллагчдагч Р,  У нарт хувийн баталгаа таслан сэргийлэх арга хэмжээ аван мөрдөн шалгах ажиллагааг үргэлжлүүлэн явуулж байна" гэв.