ЭМЯ-наас тарваган тахлын өвчлөлийн нөхцөл байдлын талаар мэдээлэл хийж байна. Хамгийн сүүлд Ховд аймгийн Мөст сумын Хужирт багийн Түймэр гэдэг газраас иргэн "С" нь 2022 оны есдүгээр 12-ны өдөр хавхаар тарвага агнаж, чанаж идсэний дараа халуурах, гүйлгэх шинж тэмдэг илэрч, аймгийн эрүүл мэндийн төвд хандсан байна. Өнөөдрийн байдлаар тарваган тахал өвчнөөр 15 хүн өвчилж, долоон хүн амиа алджээ. 17 аймгийн 147 сумыг тарваган тахлын голомтот аймаг гэж үздэг, Улаанбаатар хотын хянан шалгах постууд дээр 827 тарвага оруулж ирэхээр баригдсан. Энэ нь нийслэл рүү тахлыг зөөх аюултай байдлыг үүсгэж байгаа аж. Халдварын ихэнх тохиолдол нь тарвага хавхаар агнасан байгааг албаныхан онцолж байна.  Мөн эрүүл мэндийн яамны нийтийн эрүүл мэндийн газрын дарга Д.Баярболд дараах мэдээллийг өглөө.

Тэрбээр “ЗӨСҮТ-өөс гаргасан тарваган тахлын байгалийн голомтын аюулын зэрэглэлээр 15 аймгийн 78 суманд хүний өвчлөл гарах эрсдэл өндөр байна гэж дүгнэсэн. Тарваган тахлын байгалийн голомтын идэвхтэй тандалтыг ЗӨСҮТ байнга хийдэг. 2012-2021 онд нийт зургаан аймгийн 11 суманд 15 хүн тарваган тахлаар өвчилж долоон хүн амиа алдсан гэх  судалгаа бий. Ер нь дотоодын аялал жуулчлалын төв зам тарваган тахлын нутагшмал голомттой бүс нутгаар дайран өнгөрдөг нь тухайн нутгийн оршин суугчдаас гадаад, дотоодын жуулчид халдварт өртөх эрсдэл өндөр байна гэж үздэг. Мөн иргэд тарвагыг хууль бусаар худалдаалан, хот суурин газар руу тээвэрлэх, хүнсэнд хэрэглэх явдал тасралтгүй гарсаар байгаа нь эрсдэл дагуулдаг. Он гарсаар Баян-Өлгий аймгийн Улаанхус , Бугат, Ногооннуур, Цэнгэл, Сагсай болон Увс аймгийн Сагил, Ховд аймгийн Мөст сумын нутгаас олдворлосон мэрэгч амьтдаас тарваган тахлын үүсгэгч нянг илрүүлсэн. Иймд тарваган тахлын хүний өвчлөл гарч, нийгмийн эрүүл мэндийн ноцтой байдал үүсэх өндөр эрсдэл байгааг тогтоосон юм. Одоогоор тарваган тахлын хяналт сэргийлэлтийн арга хэмжээг эрчимжүүлэх талаар Эрүүл мэндийн сайд аймаг нийслэлийн засаг дарга, аймгийн эрүүл мэндийн газар, зоонозын өвчин судлалын төвүүдэд хандсан албан даалгавар гаргаж, хүргүүлсэн” гэв.