Улс орон даяар “Үндэсний бичиг соёл, номын өдрүүд-2022” арга хэмжээг энэ сарын 16-18 өдрүүдийн хооронд тэмдэглэн өнгөрүүлж байна. Харин энэ удаагийн арга хэмжээний тухайд “Монсудар” хэвлэлийн газрын маркетингийн менежер Э.Цэнгэлсайхан бидэнд өөрийн сэтгэгдлийг хуваалцлаа. Тэрбээр “Ном хэвлэлийн салбарт тулгамдаж байгаа асуудал нь шаардлагатай түүхий эдийн үнийн өсөлт байна. Хэвлэлийн хамгийн том зардал нь тээвэрлэлт болон цаасанд байдаг. Он гарснаас хойш эдгээр зардал 25 хувиар нэмэгдсэн. Үүний улмаас бүтээгдэхүүнийхээ үнийг нэмчихвэл эрэлт буурах эрсдэлтэй. Төрийн зүгээс ном хэвлэлийн газруудыг дэмжиж ажиллана гээд л олон зүйл бидэнд хий хоосноор амалдаг ч бодит байдал дээр ямар ч үр дүнгүй, ойлгомжгүй байдаг. Миний хувьд олон удаагийн номын баярт оролцож байна. Ойрын жилүүдэд номын баяр гэхээсээ илүү худалдаа үйлчилгээ л давамгайлдаг болж. Үнэндээ номын баярыг илүү үр бүтээлтэй буюу утга учиртайгаар зохион байгуулах нь чухал байна. Манай хамт олон жил бүр номын хэлэлцүүлэг хийж, уншигч, зохиолчдыг урьж уран бүтээлийн ярилцлага хийдэг. Энэ нь хүмүүсд илүү ихээр нөлөөлдөг. Цаашлаад залуусыг ном, зохиолд татаж, уриалахад ихээр нөлөөлсөн. Төрийн зүгээс номын баярыг ивээн тэтгэж ажиллаа гэх боловч асарын үнэ өндөр байгаа хэвээр. Үүнээс болж ном борлуулж байгаа уран бүтээлч, байгууллагуудад хүндрэлтэй байсаар байна” гэв.