Европын холбооноос Монгол Улсад суугаа Төлөөлөгчийн газар санаачлан “Эх дэлхийн цэвэрлэгээний өдөр”-ийг өнөөдөр зохион байгуулж байна. Тус ажиллагаанд БОАЖЯ, НҮБ-ын Хөгжлийн хөтөлбөр, Франц улсын ЭСЯ, олон улсын “Каритас Чех Репаблик” байгууллага, “Төвшин сайхан мөнх”, “Өнгө нэм”, тогтвортой хөгжлийн "Амгалан дэлхий” зэрэг ТББ хамтран оролцоно.

      Энэ өдрийг тохиолдуулан Монгол Улсад үйл ажиллагаа явуулж буй олон улсын байгууллагууд өнөөдөр нийслэлийн Баянзүрх, Сүхбаатар дүүргийн нутаг дэвсгэрт, Сэлбэ голын эргийн дагуу газруудыг цэвэрлэх гэж байна. Үйл ажиллагаа нийслэлийн төв талбайд өглөө эхэлж, Зуун айлын гүүрнээс Дамбадаржаа, Дарь эхийн рашаан хүртэл Сэлбэ голын эрэг дагуу өртөөчлөн цэвэрлэгээ хийж дахивар хог түүн цуглуулах юм. Мөн дахивар нөөцийг ангилан ялгаж, иргэдийн гэртээ болон ажил дээрээ ангилж хураасан дахивар нөөцийг хүлээн авч дахин боловсруулах үйлдвэрт өгөх, хуучин хувцас хэрэглэлээ солилцох, хандивлах зэрэг ажлыг төлөвлөсөн аж.

    Мөн Европын Сэргээн босголт хөгжлийн банк, Туул голын сав газрын захиргаа, “3R4UB” төсөл, Голомт банк, “ROC” кофе шоп, “Шкаф”, “Хурын шим” ХХК, Тэргэнцэртэй иргэдийн үндэсний холбооны дэргэдэх “Эко гивт” компани, Монголын хог хаягдлын менежментийн цогц нэгдсэн холбоо, Баянзүрх дүүргийн 29 дугаар хороо хамтран ажиллах юм.