Монгол Улсын Соёлын гавьяат зүтгэлтэн, Ufilm уран бүтээлийн нэгдлийн захирал, жүжигчин Г.Ундармаагийн төрсөн өдөр өнөөдөр тохиож байна. Тэрбээр одоогоос дөчин найман жилийн өмнө Говь-Алтай аймгийн Есөнбулаг суманд төржээ. 

         Жүжигчин Г.Ундармаа 1997 онд хошин урлагт хөл тавьсан бөгөөд 2000 - 2013 онд "Шинэ үе" продакшнд жүжигчнээр ажиллаж байв. Харин 2013 оноос хойш “Single ladies 1, 2, 3, 4”, “Тютю”, “Амьдралоги”, "Улаан Цэцэг" зэрэг бүрэн хэмжээний уран сайхны киногоо үзэгчдийн хүртээл болгож, ард түмний хайртай жүжигчин, эгэл гоо үзэсгэлэнгийн илэрхийлэл болсон жүжигчин билээ. Түүнчлэн тэрбээр "Итгэлийн танхим" ТББ -ыг үүсгэн байгуулан эрүүл мэндийн байгууллага, эмнэлгийн үйлчилгээнд тав тухтай, эмх цэгцтэй, соёлтой орчныг бий болгоход хувь нэмрээ оруулсаар ирсэн энгүй их үйлсийн эзэн юм. Энэхүү ажлыг нь 2018 онд Эрүүл мэндийн салбараас үнэлэн Эрүүл мэндийн тэргүүний ажилтан цол тэмдгээр шагнасан юм. Хошин урлагийн тайзнаас авахуулаад кино урлагт “Ариунсанаа” нэрээрээ ард түмний сэтгэлд тод товруунаар үлдэж чадсан сайн ч жүжигчин, сайн ч үйлстэн аж. 

          Тэрбээр төрсөн өдрөө тохиолдуулан өөрийн цахим хуудсандаа өнөөдрийг хүртэл туулж ирсэн амьдралынхаа хэсэгхэн дурсамжийг хуваалцжээ. “Шинэ үе продакшн”-нд Амбий ах, Хүрлээ ах , Бооео, Аси, Чимгээ эгч нартайгаа шинэ шинэ тоглолтуудын ард амжилттай гарсан. Анун ХХК ажиллах үедээ хамт ажилладаг MCS ХХК ын спортын наадмуудад Ануныхаа нэрийг дажгүй аваад гарчихдаг Батжаргал гэдэг тамирчин залуутай хуримаа хийж өнөөдрийг хүртэл хайрлаж, эрхэлж, хөөрхөн охин Бэрцэцэгтэйгээ хамтдаа аз жаргалтай амьдарч байгаа. Тэгээд л хаанаас ч бие биенийгээ олсон юм бол гэхээр гайхалтай найзууд минь. Ёстой хаана ч ямар ч ажилтай байсан зовлонгоо яриад дээрэлхээд дуудчихдаг хөөрхөн найзууд байнаа байна. Бас төрсөн эгч шиг минь үргэлж анхаарал тавьдаг өөрсдөөрөө надад үлгэр дуурайлал болсон эгч нар минь гээл  Ингээд цааш та нар бараг мэднэ дээ тэ. Ufilm тайз дэлгэцийн уран бүтээлийн нэгдэл байгуулаад менежер Хулантайгаа, мөн чадварлаг, зүтгэлтэй залуустайгаа "Тютю", " Single ladies” 1,2,3 , "Амьдралиоги" "Ангарагаас ирсэн эмэгтэй” гээл уран бүтээлүүд дээр ажилласаар өнөөдрийн энэ өдрийг хүргэлээдээ.  Зүгээр л өглөө дурсан бодсон дурсамжаа буулгачихлаа. Ямар сайхан хүмүүсийг бурхан надад илгээсэн юм бэ” гэв. Тайз, дэлгэцийн уран бүтээлээс гадна эрүүл мэндийн салбарт хувь нэмэр оруулж, олон хүний амьдралд гэгээ түгээж байгаа түүний их үйлсэд талархаад барахгүй.