"Тавантолгой Түлш" ХХК- ийн Хэрэглэгчдэд үйлчлэх төвийн Засвар үйлчилгээний хэсгийн ажилчид нэг айлыг галын аюулд өртөхөөс хамгаалж чаджээ. Энэ талаар “Тавантолгой Түлш” ХХК-ийн Хэрэглэгчдэд үйлчлэх төвийн Засвар үйлчилгээний хэсгийн дарга Д.Даваадуламаас тодрууллаа. Тэрбээр “Манай ажилчид Сонгинохайрхан дүүргийн гэр хорооллын айлуудын зууханд түлш хэмнэгч үнэ төлбөргүй суулгаж байгаа. Ингэж явахдаа өнөөдөр 09.30 цагийн үед Сонгинохайрхан дүүргийн 28 дугаар хороонд айл шатаж байхтай таарч, Онцгой байдлын Ерөнхий газрын Аврах ангийнхан иртэл шороо, усаар багасгаж, хажуу талын айл шатахаас хамгаалж чадсан. Манай зургаан ажилтан гал унтраах ажилд оролцсон юм билээ. Манай ажилчид айлуудаар орж, ажил үүргээ гүйцэтгэж явахдаа бусдад анхан шатны тусламж, дэмжлэг үзүүлж, бусдын амийг аварч чаддаг баатарлаг хүмүүс байдаг. Шатаж байсан гэр хүүхэд байгаагүй. Хоёр эмэгтэй хоёр эрэгтэй хашаандаа байсан. Архи, согтууруулах ундааны зүйл хэрэглэсэнтэй холбоотой гал гарсан байж магадгүй” гэсэн юм.