Монгол Улс өөрийн хэрэгцээний бүтээгдэхүүнээ эх орондоо үйлдвэрлэдэг болохыг зорьсоор байна. Гэр ахуй, хүнс, гоо сайхан, бэлэг дурсгал гээд салбар бүрд өөрсдийн хэв маяг, технологиороо онцгойрсон бүтээгдэхүүн хийж байгаа компани, гарааны бизнес эрхлэгчид цөөнгүй. Тэгвэл эх орондоо үйлдвэрлэж буй онцлох ТАВАН бүтээгдэхүүнийг танилцуулж байна.

"Гоо" брэнд

Монголын гоо сайхны зах зээлд 2014 оноос Байгаль орчин, эрүүл мэндэд сөрөг нөлөөгүй “Гоо” брэндийн гар хийцийн Органик Гоо сайхны бүтээгдэхүүнийг Олон улсын стандарт, технологийн дагуу үйлдвэрлэж байгаа билээ.Өдгөө 60 гаруй төрлийн гоо сайхны бүтээгдэхүүнийг дотоод, гадаадын байгалийн цэвэр түүхий эд ашиглан гар болон механик ажиллагаагаар бэлтгэн, байгальд ээлтэй хаягдалгүй үйлдвэрлэлийг зах зээлд нэвтрүүлж байна. Монгол Улсын  шим тэжээлт зөгийн бал, жимс, жамц давс, хонины сүүл, нарс модны давирхай, чацаргана гэх мэт түүхий эдийг ашиглан, “Гоо” брэндийн 100% байгалийн гаралтай, органик гоо сайхны дараах бүтээгдэхүүнүүдийг үйлдвэрлэж байна.

"Buramhan" 

  Чихрээ гар аргаар болон үйлдвэрийн гэсэн хоёр төрлөөр хийдэг. Чихэртээ байгалийн гаралтай амт өнгийг оруулж, витамин С-ээр баяжуулан хамгийн чанартай бүтээгдэхүүн хийдэг. Buramhan компани нь 2007 онд байгуулагдсан бөгөөд 2016 оны хоёр дугаар хагасаас эхлэн гараар урласан хатуу чихрийг Монголын зах зээлд нийлүүлэх энэхүү төслийн судалгааны ажлыг эхлүүлсэн. Улмаар бүтээгдэхүүнийг 2017 оны зургадугаар сараас эхлэн одоог хүртэл нийт есөн нэр төрлийн бүтээгдэхүүнийг зах зээлд Улаанбаатар хотын 300 орчим цэгээр нийлүүлж байна.

"Mossa Brand"

"Mossa Brand" нь 2016 оноос эхлэн давсан цэцэг, бэлэг дурсгал, гэр ахуйн чимэглэлийг цоо шинэ технологиор үйлдвэрлэж эхэлсэн. Нийт  50 гаруй нэр төрлийн бүтээгдэхүүнийг үйлдвэрлэж дотоодын цэцэг, бэлэг дурсгалын зах зээлд цоо шинэ төрөл нэмж хамгийн анхны давсан бүтээгдэхүүнийг нийлүүлдэг болсон билээ. Тус компанийн бүтээгдэхүүний онцлог давуу тал нь байгалийн түүхий эд болох 100% давсаар хийгддэг. Давсан бүтээгдэхүүний найрлага орц бүр нь цэвэр органик хүний биед сөрөг нөлөөгүй мөн байгальд уусан шингэж хог хаягдал үүсгэдэггүй эко бүтээгдэхүүн юм.

"YALGUUN BRAND"

“Ялгуун Аксесорис” ХХК нь 2017 оны хоёрдугаар  сарын 03-нд  үүсгэн байгуулагдсан бөгөөд 600 орчим бүтээлийн сантай.  “Ялгуун Аксесорис” Брэнд нь Үндэсний түүх соёл, өв уламжлалыг дэлгэрүүлэх, Үндэсний бахархал шингэсэн, Монгол оюунаар бүтээгдсэн бүтээлүүдийг орчин цагийн хэлбэрээр урлагийн сонгодог хэлбэрүүд болох уран зураг, торгон алчуур зэргийн төгс нийлэмж бүхий гоёл чимэглэл бүхий алчуур, цүнх, аксесорис, хувцас, гэр ахуйн бүтээгдэхүүн үйлдвэрлэж байна.

"Dansran"

“Dansran” нь эмэгтэй гоёл чимэглэлийн брэнд бөгөөд  монгол ахуй, түүх соёл шингээж загвараа урладгаараа онцлог юм.  Жишээ нь “Гоо марал” “Үнэг” коллекц нь үндэсний үлгэр домгийн хэв шинжийг  тусган бүтээсэн билээ.