-Хүчирхийлэлийн хохирогч нас барсан бол 12-20 жил эсвэл бүх насаар хорих ял онооно-

 Насан хүрээгүй хүүхдийг хүчирхийлж, бэлгийн дур хүслээ зүй бусаар хангах хэрэг сүүлийн жилүүдэд нэмэгдэж байгаа. Үүнтэй холбоотойгоор бэлгийн эрх чөлөө, халдашгүй байдлын эсрэг гэмт хэрэг үйлдэж буй этгээдэд  хуулийн ямар хариуцлага оноодог болохыг сэрэмжлүүлэг болгон хүргэж байна. Хохирогчийн хүсэл зоригийн эсрэг хүч хэрэглэж, хүч хэрэглэхээр заналхийлж, эсхүл сэтгэцийн өвчтэй, согтуурсан, мансуурсан, сэтгэцийн үйл ажиллагаа нь түр сарнисан, бусад өвчний улмаас биеэ хамгаалах, эсэргүүцэл үзүүлэх чадваргүй, эсхүл эд хөрөнгө, албан тушаал, бусад нөхцөл байдлын улмаас эрхшээлдээ байгааг далимдуулан хүчээр бэлгийн харьцаанд орсон, эсхүл бэлгийн харьцааны шинжтэй хүч хэрэглэсэн үйлдэл хийсэн бол нэг жилээс таван жил хүртэл хугацаагаар хорих ял шийтгэх аж. Мөн Эрүүгийн хуулийн 12 дугаар зүйлийн

2.1.арван дөрвөөс дээш арван найман насанд хүрээгүй хүнийг хүчиндэх

2.2.бүлэглэж

2.3.гэр бүлийн хамаарал бүхий харилцаатай хүнийг хүчиндэж

2.4.хохирогчийг жирэмсэн болгож

2.5.хохирогчид бэлгийн замын халдварт өвчин халдааж

2.6.хоёр, түүнээс олон хүнийг хүчиндэж

2.7.урьд нь энэ бүлэгт заасан гэмт хэргийг үйлдэж гэм буруутайд тооцогдож байсан хүн

2.8.харгис хэрцгий аргаар

2.10.хохирогчийг тохуурхан доромжилж үйлдсэн бол таван жилээс арван хоёр жил хүртэл хугацаагаар хорих ял шийтгэнэ.

Харин энэ гэмт хэргийн улмаас ураг зулбасан, эсхүл арван зургаан насанд хүрээгүй хүнийг жирэмсэн болгосон, гэр бүлийн хамаарал бүхий арван зургаан насанд хүрээгүй хүнийг хүчиндсэн бол найман жилээс арван таван жил хүртэл хугацаагаар хорих ял шийтгэнэ. Мөн энэ гэмт хэргийг бага насны хүүхдийн эсрэг үйлдсэн, гэмт хэргийн улмаас хохирогч нас барсан бол арван хоёр жилээс хорин жил хүртэл хугацаагаар, эсхүл бүх насаар хорих ял оноох аж.