Ү.Гантулга өдөрт 60 тонн цемент буулгадаг. Тэрбээр ажлаа өглөө 08:00 цагт эхлээд, орой гэхэд гурван вагон цемент буулгах ёстой. 60 тоннын нэг вагон цементийг гурван хүн зэрэгцэн буулгах бөгөөд нэг ачигч дангаараа 60 тонныг буулгах аж.

  Хамт ажиллаж байгаа ах нар нь Тук хэмээн дуудах Ү.Гантулга энэ жил 24 нас хүрч байгаа гэнэ. Ерөнхий боловсролын сургуулиа төгссөнөөс хойш аав, ахдаа тусалж, ар гэртээ дэм болъё гэсэн Тук цемент буулгаж эхлээд зургаан жил болжээ.

     Өнгөрсөн зургаан жилийн хугацаанд Ү.Гантулга бүх нийтийн амралтын өдрөөс бусад бүх өдөр ажилласан гэнэ. Долоо хоногийн долоон өдөр амралтгүй ажилладаг Ү.Гантулга “Ах нар “Залуу хүн залхуурах ч завгүй байвал гоё” гээд байдаг” тухайгаа ч ярив. Өдөрт 60 тонн цемент буулгах нормтой түүний өнгөрсөн зургаан жилийн ажлыг тооцвол нийт 130 мянга гаруй тонн цемент буулгажээ. Өдөр шөнөгүй, зогсоо зайгүй цемент буулгахаасаа Тук шантрахгүй. Харин ч цемент ачих машин нь хурдан ирвэл баяртай нь аргагүй ажлаа хийнэ.

     Гурвалжингийн гүүрний “44” барилгын материалын төвд хэд хоногтоо 30 гаруй вагон цемент бууна. Түүнийг нь өөр өөр компанийн 10 гаруй ажилтан нийлж, нэг вагонд гурав гурваараа хуваарилагдаж, буулгах аж. Цемент ачих гэж ирэх “Портер”, “Кантер” маркийн машинууд нэг явалтаараа 10 тонн цемент ачдаг юм байна. Нэг вагон цемент буулгахад зургаан машин хэрэгтэй гэсэн үг. Харин замын түгжрэл, жолооч гээд ачигчаас үл шалтгаалах асуудлуудаас болоод ачааны машин ирэх гэж цаг алддаг гэнэ. Харин энэ талаар Ү.Гантулга “Машинууд ар араасаа хурдан ирчихвэл юухан байх вэ. Нэг вагоныг хоёр цагийн дотор л буулгачихна” хэмээсэн юм.