Боловсрол, шинжлэх ухааны сайдын 2022 оны наймдугаар сарын 19-ний А/296 дугаар тушаалаар ХҮИС-ийн сургалт эрхлэх тусгай зөвшөөрлийг цуцалсан. Тэгвэл тусгай зөвшөөрлөө цуцлуулсан ХҮИС-иас Боловсрол, шинжлэх ухааны яамыг шүүхэд өгөхөөр болсон.

                                      Энэ талаар ХҮИС-ийн захирал М.Должин “2022 оны наймдугаар сарын 3-ны өдрийн Засгийн газрын 293 дугаар тогтоолыг Боловсрол, шинжлэх ухааны сайд наймдугаар сарын 19-нд олон нийтэд танилцуулсан. Тухайн үед сургуулийн захиргаа амралттай байсан ч багш, ажилтнуудаа наймдугаар сарын 22-нд цуглуулж, ажилдаа орсон. ХҮИС-ийн тусгай зөвшөөрлийг цуцалж байгаа тухай хэвлэлээс сонсож улмаар БШУ-ны сайдтай уулзах хүсэлт өгч, мэдээлэл авахыг хүссэн ч уулзаж чадаагүй.

Тэгээд есдүгээр сарын 1-нд БШУЯ, МУИС-ийн хамтарсан Ажлын хэсэг ХҮИС дээр ирж, захирлыг чөлөөлөх тухай тогтоол өгсөн. Өнөөдрийг хүртэл ХҮИС-ийн сургалтын үйл ажиллагаа хэвийн явж, холбогдох байгууллагуудаас стандарт шаардлага зөрчсөн тухай ямар нэг баримт, акт гараагүй. Харин ч 2019 онд хоёр дахь удаагаа байгууллагаа магадлан итгэмжлүүлсэн, 2021 онд урьдчилсан магадлан итгэмжлэлд орж, докторын хоёр, бакалаврын нэг хөтөлбөрөө шинээр нээсэн, 2022 онд бакалаврын хоёр хөтөлбөрөө магадлан итгэмжлүүлсэн байтал энэ үндэслэлийг дурьдсан нь сургуулийн нэг хүндэд халдаж, ХҮИС-ийн хамт олны ажлын үр дүн, хөдөлмөр зүтгэлийг үгүйсгэсэнд харамсаж байна.

                                      Худалдаа үйлчилгээ, бизнесийн салбарт 45 мянга гаруй мэргэжилтэнг бэлтгэсэн гаргасан 99 жилийн баялаг түүхтэй, төрийн өмчийн энэхүү ууган сургуулийг салбарын  яам нь “Мэргэжлийн хяналтын байгууллагын дүгнэлтээр стандарт зөрчсөн, сургалт эрхлэх тусгай зөвшөөрлийн нөхцөл шаардлагыг удаа дараа хангаагүй” зарим сургуультай ижил болгож, сургалт эрхлэх тусгай зөвшөөрлийг хүчингүй болгох тухай тушаалыг гэнэт гаргасан нь хууль тогтоомжийн холбогдох заалтуудыг зөрчсөн үйлдэл гэж үзэж, сургуулийн хамт олон нэр төрөө сэргээж, эрх ашгаа хамгаалуулах зорилгоор шүүхэд хандахаар боллоо” гэсэн юм.